Hotel ambientalmente sostenible ta bin unda cu antes tabata Nanki Club

ORANJESTAD(AAN): Unda cu antes tabata tin Esso Club (Nanki Club), ta bay bin un Boutique Hotel di 40 camber.

Durante un conferencia di prensa Diabierna atardi, inversionista Alberto Perret Gentil di Perret Group a splica cu e intencion ta pa construi un asina yama Eco Lodge, cu ta ambientalmente sostenible.

Perret Gentil a gradici San Nicolas Business Association (SNBA) pa nan ayudo y sosten den e proyecto aki.

El a splica cu for di 2016, Perret Group tabata buscando oportunidadnan pa inverti den San Nicolas.

“Awe ta e prome dia pa hopi mas cos bunita cu ta na caminda”, segun Perret Gentil, kende a gradici tambe Prome Minister Evelyn Wever Croes kende for di un inicio a yuda cu e proyecto aki.

El a splica cu e Hotel ta bay ta di dos piso so y ta tene cuenta cu tur aspecto di medio ambiente.

“E idea ta pa trece bek Nanki Club na locual e tabata, entre otro cu varios palo di coco”.

E invesionista a bisa cu nan ta pone tur nan confianza den San Nicolas y el a agrega cu e proyecto ta conta cu un inversion di 30 miyon florin.

E ta calcula cu na prome instancia e proyecto aki lo trece trabao pa alrededor di 50 pa 60 persona.

Construccion lo dura entre 1 aña y mey pa 2 aña, mientras cu lo tuma alrededor di 1 aña prome cu keda cla cu e permisonan di D.O.W y DIP.

E lodge ta bay tin un pool y un fitness center.