Hospital ainda no ta den 'Codigo Preto' pero e problema mas grandi ta personal

*Tin espacio na Colombia ainda pa por sigui yuda Aruba - ORANJESTAD (AAN): Prome Minister Evelyn Wever-Croes a duna di conoce den conferencia di prensa

cu na e momentonan aki tin varios pashent (14) di Covid-19 di Aruba cu ta interna na Colombia na Fundacion Santa Fé na Bogota y na Bucaramanga.

A haya confirmacion door di Director Interino di AZV, Edwin Jacobs cu tambe tin Barranquilla como stand-by caba, preparando den caso cu tin mester.

E mandatario a indica tambe cu tin espacio na Colombia ainda pa por sigui yuda Aruba.  Sinembargo, esey no ta kita afo cu e situacion ta hopi critico pasobra ta haya hendenan cu ta scoge pa no bay Colombia pasobra nan ta prefera di keda aki na Aruba of nan famia ta scoge esey.

E situacion na Hospital ta critico y pesey diabierna anochi Crisis Team a reuni urgentemente pa analisa unda ta para aworaki. E problema cu mas mester di solucion aworaki ta personal.

Ora cu mester di personal na Aruba tin un grupo di personal cualifica y prepara cu por tuma over pero e islanan ruman ta confrontando e mesun retonan cu Aruba na e momentonan aki. Pesey a haci un peticion un biaha mas pa a traves di Hulanda pa haya refuerzo internacional.

Siman pasa Aruba a haya un grupo di refuerzo, pero den weekend tabata sperando pa tende cu Aruba lo haya mas personal, Wever-Croes a indica. 

Mientrastanto na Aruba a tuma pasonan. Tur specialista a wordo pidi pa yuda cu e pashentnan di Covid-19. Tambe ImSan a wordo pidi y tur ta dunando nan cooperacion, a remarca. 

Esaki ta trece un situacion unda operacionnan na Hospital y na ImSan mester para. Tratamentonan tambe pa asina tur personal por ta disponibel pa yuda e pashentnan di Covid.

Ainda e situacion na Hospital ta bao control y no tin motibo pa panico, pero si ta hopi cerca di crusa e linea aki.

Hospital a pidi Crisis Team pa enfatisa cu Hospital no ta den codigo preto, cual ta un codigo di emergencia, esun di mas critico cu por tin den un hospital.

Ora un hospital ta den e codigo aki ta yega e momento di scoge ken ta haya tratamento y ken no. Scoge ken ta biba y ken ta muri, pero no a yega eynan pasobra tin opcion ainda, e mandatario a splica.

Hospital ta urgi tur esnan cu ta sinti malo di Covid-19 pa nan busca cuido mas lihe. Tin hendenan cu a yega Hospital hopi malo y no por a wordo yuda mas. Otronan cu si por a wordo yuda ta exigi un tratamento mas intensivo na e momento ey y esey ta causa e problema di capacidad cu tin na Aruba, a enfatisa.