ORANJESTAD (AAN): Diasabra mainta un situacion urgente a presenta riba Avenida Nelson Oduber, net un tiki pariba di Marriott Vacation Club.
Un vehiculo tipo UTV di e compania De Palm Tours cu apenas a caba di cuminza cu un tour, a cuminza kima.
E personanan cu tabata den e UTV, a core hala un banda, y a bula pa scapa nan bida di e candela cu den un frega di wowo a bira fuerte. Net e ora ey DIARIO su fotografo ta pasando y e saca e potret aki. Bo ta mira con e candela a caba di cuminza den e parti patras unda e motor ta. Diferente biaha fotografo di DIARIO a tende algun explosion, e.o. di e wielnan..
Ora e tanki di gasolin a explota, e candela a bira mas feroz y tabata produci huma diki cu tabata visible di leu. Personal di Hotel a yega cerca cu algun fire extinguisher, pero esakinan a caba mesora y no a haci hopi efecto. E candela tabata asina grandi cu el a hasta stroba trafico di pasa e mainta ey riba caminda.
Unidad di Bombero a yega for di Tanki Flip, y mesora a domina e candela. Nada mas a resta di e vehiculo, djis e chassis.
E demas turistanan a sigui normal cu nan Off-Road Trip cu nan UTV, pero esnan cu a huur esaki si a keda atras pa atende e caso cu a socede cu nan. Ningun hende a resulta herida.
