Horcan Elsa hayando mas forza lo pasa awe panort di Aruba

ORANJESTAD (AAN): Horcan Elsa awe Diasabra lo bay ta pasando mey-mey di Aruba y Republica Dominicana.  Pero mayoria di advertencia ta pa e paisnan cu ta keda panort di e ciclon aki.

   Awe e lo pasa pazuid di Hispaniola, y pesey tanto Haiti y Republica Dominicana a ricibi un Hurricane Warning.  Bientonan cu forza di Horcan ta extende te cu 35 km for di e centro di Horcan Elsa.   Bientonan cu forza di Tropical Storm ta extende te cu 220 km leu for di e centro di Horcan Elsa.

   Diabierna atardi 5:00 pm, e centro di Horcan Elsa tabata na 14.2º Nort y 63.7º West, cu ta 815 km Zuidoost di Santo Domingo, Republica Dominicana. Su bientonan maximo sosteni ta di 140 km/h, y ta moviendo direccion west cu 48 km/h.  E ta pues keto bay un Horcan di Categoria 1.

   Riba Diabierna, imagennan di satelite a indica cu Horcan Elsa a bira mihor organiza, y data di radar for di Barbados y Martinique, a mustra cu varios biaha el a purba di traha un wowo.  E muraya banda panort di loke lo bira e wowo, a pasa net riba Barbados banda di 7’or di mainta, y e isla a raporta algun biento cu forza di horcan e momento ey.

   Mientras tanto e avion Hurricane Hunter a lanta vuelo for di Aruba y a bay bula den e mal tempo.  Nan a nota cu e circulacion di e Horcan no ta bon forma, debi cu e tormenta ta moviendo cu velocidad hopi rapido.  Pero si a registra biento sosteni di como 140 km/h, cu algun rafaga mas halto.

   E ta moviendo direccion West-Noordwest cu 48 km/h.  Cu e movimento rapido ey, e lo yega awe Diasabra na e costa pazuid di Republica Dominicana.  Despues di esey, tin indicacion cu e lo cuminza move mas direccion panort, aunke e lo topa cu seronan hopi halto na e parti oriental di Cuba cu lo bay afecta Elsa, despues sigui pa pasa door di Bahamas.  Ora e yega Cuba, tin chens cu bientonan lo baha un tiki.

   Sinembargo tin chens cu e lo por tarda pa ‘bira’, y esey lo pone yega mas pabao y pasa door di e canal di Yucatan y west di Cuba.

   National Hurricane Center ta pronostica cu awe e por sigui haya mas forza.  Pero ora cu e cuminza pasa riba Cuba y topa cu bientonan di nivel mas halto riba Golfo di Mexico, e lo por debilita un poco.

   ADVERTENCIANAN: Mientras tanto Servicio Meteorologico di Cayman Islands a emiti un Tropical Storm Watch.

   Un Hurricane Warning ta na vigor pa e costa zuid di Republica Dominicana, for di Punta Palenque te na frontera cu Haiti.

   Tin Hurricane Warning na vigor pa parti zuid di Haiti di Port-au-Prince te na e frontera zuid di Republica Dominicana.

   Un Hurricane Warning a wordo emiti pa Jamaica.  Hurricane Watch emiti pa provincianan mas pariba di Cuba.

   Riba Diabierna, un Tropical Storm Watch a wordo emiti pa Grenada, Saba, St. Eustatius, costa panort di Republica Dominicana (for di Cabo Engaño te na Bahia de Manzanillo).

   Ta pidi esnan na Puerto Rico, Cuba, y Virgin Islands pa keda vigila e progreso di Horcan Elsa.

   E paisnan bao di advertencia, tin di check como cu lama por subi hasta 1 meter mas halto cu normal y causa inundacion na costa.

   E cantidad di awacero riba Diabierna tabata na un total di 101 mm te cu 203 mm, cu un maximo di 380 mm na e islanan banda panort.  Pa awe, ora di pasa pazuid di Rep. Dominicana y Haiti, e lo por laga maximo di 101 mm te cu 203 mm tambe di awacero.