Hopi turista no kier bay Venezuela pasobra e pais ta usando avionnan obsoleto

VALENCIA: Nan ta chikito, y obsoleto!  Esey ta e avionnan cu aerolineanan na Venezuela ta usando, y nan ta realmente esnan mas bieu den e region. 

Y esaki ta loke turistanan ta tuma na consideracion tambe, ora na dicidi ta ki pais nan kier bay bishita pa pasa vacacion.

   E problema ta cu e avionnan aki no ta ofrece comodidad ni calidad di servicio cu si nan lo haya si nan bula pa otro paisnan.

   Ora bo ta bulando un vuelo domestico den un pais, sea ta di 45 minuut of 1 ora, e pasaheronan no ta preocupa hopi cu esaki.  Pero si hendenan ta viahando di otro pais, e ora si nan ta tuma na cuenta e factor ey.

   “Pa un turista internacional cu tin aerolineanan manera Copa Airlines y Avianca cu rutanan internacional manera Punta Cana, Cancun, y Panama cu avionnan nobo y bon calidad di servicio, nan lo prefera di book pasashi cu nan, envez di viaha pa Venezuela den avionnan chikito y bieu,” ta loke e vice-president di Camara de Turismo di Carabobo, Argenis Sanchez a declara e siman aki.

   Y riba esaki, bo tin di tene cuenta cu e condicionnan den cual mayoria di Terminal Internacional na Venezuela ta aden aworaki.  Aunke e Aeropuerto Arturo Michelena na Valencia a wordo remodela y ta un di e mihornan, toch e ta ainda chikito pa e demanda cu ta presenta, y esey ta pone cu pasaheronan ta pasa den momentonan di incomodidad.

   Pero tin otro Aeropuerto cu ta den desventaha pa cu nan infrastructura, manera esun di Barcelona.  E pensamento cu Venezuela mester enfoca riba dje, ta cu tin di drecha Aeropuertonan cu e punto di bista pa duna servicio na pasaheronan internacional.

  No lubida riba Aeropuerto Bartolomé Salom di Puerto Cabello, cu ya tin 4 aña sin cu e ta operando.  Esaki ta claramente un deficiencia den e servicio turistico.  Siendo cu e ta un Aeropuerto hopi privilegia pa rutanan pa Caribe debi na su ubicacion.

   Camara de Turismo ta desea pa e Aeropuerto Bartolomé Salom wordo reactiva bek cu rutanan specifico, manera viahe di Los Roques.  Cu bon trabao y promocion, e Aeropuerto ey di Puerto Cabello lo por ta un bon pieza pa turismo na estado Carabobo.

   Nan ta haya importante tambe pa habri rutanan internacional nobo for di Aeropuerto Arturo Michelena di Valencia pa e.o. Bogota of pa Islanan ABC Hulandes cu ta ainda cera pa motibonan politico, y cu tabata hopi importante pasobra nan tabata incentivo pa turismo di salud y compras.

   “Nos tabata haya hopi hende di Aruba y Curacao pa haci tratamento medico of pa cumpra mercancia na Valencia,” Argenis Sanchez a bisa.

   Nan ta spera cu tambe Venezuela habri bek mas ruta domestico pero pa esey bira mas realidad, e aerolineanan tin di bay inverti pa cumpra avionnan nobo tambe.