TV cu smaak delicioso --- TOKYO: Un profesor Japones a desaroya un pantaya di TV prototipo cu bo por lembe, y cu ta imita sabornan di cuminda,
y esaki ta un otro paso mas pa crea un experiencia di mira algo cu multi-sensor pa bo curpa.
E aparato cu ta wordo yama Taste the TV (TTTV) ta usa un carusel di 10 bleki di sabor cu ta spuit den combinacion pa crea e sabor di un cuminda en particular. E muestra di sabor e ora ta move riba un plastico higienico riba un pantaya flat di TV pa asina e televidente por bay purba.
Den e epoca di Covid-19, e tipo di tecnologia aki por mehora e forma cu hendenan ta conecta y interactua cu e mundo eyfo, segun profesor Homei Miyashita di Meiji University. “E meta ta pa haci posible cu hendenan por haya e experiencia di come na un restaurant na un otro parti di mundo, siendo cu nan tey keto bay na nan cas,” el a bisa.
Miyashita a traha cu un equipo di como 30 studiante cu a produci un variedad di aparato cu ta traha cu sabor, incluyendo un forki cu ta haci cuminda smaak mas dushi ainda. El a bisa cu el a construi e prototipo di TTTV su mes den aña cu a pasa, y a mustra cu un version comercial lo bay costa como 100.000 yen (como US$ 875) pa fabrica.
Posible aplicacion ta inclui lesnan remoto pa koki y tambe sommeliers, weganan di purba sabor, y hasta quiz, segun el a bisa. Miyashita a cuminza papia caba cu companianan encuanto uso di su tecnologia di spray pa aplicacionnan manera un aparato cu por aplica un sabor di pizza of chuculati riba un slice di pan tosta.
E ta spera tambe di por traha un plataforma unda sabornan for di rond mundo por wordo download y goza door di e televidente, mescos cu awor bo ta goza di musica.
Un studiante di Meiji University a demostra e TTTV pa reporteronan, bisando e pantaya cu e kier smaak chuculati dushi. Despues di algun biaha cu el a bisa esaki, un voz automatico a ripiti su orden y spraynan a cuminza basha un muestra riba un pida plastico.
“E ta smaak chocolate milk,” el a bisa. “E ta dushi manera sauce di chuculati”.
