Hopi turista mericano disgusta cu e rij largo diasabra na aeropuerto

5316 turista a yega Aruba diasabra --- *Basta vuelo a sali for di Aruba pa Merca

ORANJESTAD (AAN): Manera ta conoci, diasabra ta un dia cu hopi turista ta drenta y ta sali for di Aruba. Esaki ta algo cu ta sosode den pasado y awor ta bolbe lanta cabes relaciona cu e echo cu mas y mas persona ta viahando y principalmente esnan cu tin 'timeshare' na Aruba.

Locual a hala atencion diasabra tabata e comentarionan riba rednan social unda algun turista tabata keha riba e rijnan largo na US Custom.

Algun hende a menciona e tiki personal pa atende na Migracion mericano. Otronan a indica cu e rijnan largo tabata pa motibo di e cantidad di vuelonan pareu cu tabata tin.

Tabata tin turista cu mester a presenta na airport 4 ora previo na nan vuelo pasobra nan tabata spanta di mira kico tabata tumando lugar na airport for di tempran.  Sinembargo, esaki ta un di e motibonan pakico ta pidi e turistanan cu ta viahando bek na pais, pa no presenta prome ya cu esaki ta ocasiona e tipo di situacionnan aki cu ta crea caos y disgusto.

Diasabra ultimo, a ricibi 5316 turista di cual 4384 ta turista di Merca. Pa loke ta e salida di turista, no tin un bista precis di cuanto hende a sali bek pa nan pais. Pero por a ripara cu tabata hopi mirando e cantidad di vuelonan cu Minister di Turismo, Dangui Oduber a duna di conoce cu a yega Aruba riba diasabra ultimo.

Potretnan cortesia Facebook Page: 'All Things Aruba' y Minister Dangui Oduber