Ministronan a keda impresiona cu proyecto di Leerorkest

ORANJESTAD (AAN): Riba un invitacion special den oranan di mainta, tanto Minister Endy Croes conhuntamente cu Minister Rocco Tjon

a bishita Aruba Adventist Academy, St. Paulus Basisschool y Graf von Zinzendorf na San Nicolas en conexion cu e proyecto di Leerorkest.

   Den luna di februari oficialmente e lesnan di Leerorkest a cuminsa na e scolnan na San Nicolas. Leerorkest ta brinda les di musica actualmente na cinco diferente scol. E meta di leerorkest ta pa siña e muchanan toca un instrumento manera fiyo, cello, dwarfluit, French horn, contrabaho, drums y percussion durante ora di scol.

   ‘Nos ta contento cu a amplia di dos scol cu tabatin den e programa pa cinco scol incluyendo Colegio Laura Wernet Paskel y Prinses Amalia Basisschool na unda tin alrededor di 400 mucha ta participando na e lesnan aki’, e Mandatario a expresa. Minister Endy Croes tambe a haya e oportunidad di toca e French horn y drums.

   ‘Nos por a tuma nota di e alegria cu e programa aki ta trece pe muchanan. E ta yuda den concentracion, den coordinacion pa cu musica y e ta alegra e mucha su bida tambe’, e Mandatario a expresa.  Den futuro cercano nos tin e proyecto aki den plan pa despues di ora di scol pa cuminsa cu proyecto di Leerorkest den cierto districtonan na Aruba y brinda les di musica na un tarifa hopi accesibel.

    Tanto e Ministerio di Husticia y Asuntonan Social como Ministerio di Enseñansa ta encarga cu e proyecto aki. E Mandatario a sigui bisa; nos a papia caba cu Leerorkest y nan ta preparando caba un documento cu lo presenta na nos dentro di e lunanan nos dilanti pa wak si nos por brinda les di musica na nos hobennan den mas districto na Aruba. Pabien na Leerorkest y tur esnan cu ta haci e bunita proyecto aki posibel.