Comentario --- Skirbi pa Mercedes Monge
Termento no ta un problema cu a surgi diripiente na mundo, ni por tapa solo cu un dede of bira cara manera na Aruba no ta conoci. Termento ta mes bieu cu humanidad, y basta lesa Bijbel un tiki riba e historia di Jesus, y mira con hopi hende a haci bofon di Dje.
No obstante, lo tabata di spera cu den e transcurso di siglonan y ultimo decadanan, e humanidad lo por a conoce mas di e tema y bira conciente cu termento ( den lenguahe moderno “bullying”) ta algo cu ta bira “viral” y cu ta afecta demasiado hende di cualkier edad, vooral esnan cu ta hopi sensitivo y vulnerable.
E tema aki ta demasiado extenso pa papia di dje profundamente den un articulo, pero locual ta mas un prioridad awo ta mustra cu termento ta violencia, cu ta genera y fomenta mas violencia.
Ta secreto publico, cu den scolnan, gruponan di deporte, etc., e “bullying” ta na orden di dia. Kizas no cu mesun intensidad, pero e tey maske sea na un forma solapa.
Y hopi biaha, maske nos no kier kere, e raiz di termento ta sembra den e propio hogar di un of mas mucha. Y di eynan, cu e resentimento cu e ta causa den e animo y hasta den e ego di un mucha, e ta sali deskita pafo di cas, sea na scol, den bario, of na cualkier otro lugar cu e ta bay topa cu su peernan.
Sin intencion di huzga of critica, refiriendo na e caso cu a bira di dominio publico, entre tres hobencita alumno di un MAVO scol, no ta prudente pa punta dede riba un of otro, sino pensa riba e quote di fout y responsabilidad cu cada un di nan tin. Y tanto mayor di yiu cu ta confronta cu termento na scol y cu tin e confianza di e mucha pa bin papia cune, ta masha na su lugar y loable cu e ta bay papia cu docente di e klas, y si esaki no worry bay cerca e cabesante, pa evita cu cos bay for di man. Mi sa, cu conocemento di causa, cu no tur ora un maestro of juffrouw (cu tur mi respet pa nan) ta tuma casonan di bullying na serio, pero tin si cu ta yama tur e partinan envolvi hunto, y ta pone straf unda mester ta ora e ta scucha version di nan tur. Stop termento ta dificil, tanten cu na cas di un mucha esaki ta sosode; tanten cu un maestro (pasobra sa pasa) ta chercha un alumno y nada no ta pasa; tanten cu mayornan no haci nan yiunan fuerte dilanti retonan di bida, y tanten cu e muchanan cu ta ter otro, y e victima, no haya ayudo profesional. Stop termento ta un mision mutuo: scol, famia, husticia si mester, y henter comunidad!
