ORANJESTAD (AAN): Hopi hende a reacciona despues cu DIARIO a publica e apertura di e bunita oficina nobo cu a wordo crea.
E ta un espacio moderno y acogedor unda parehanan por planea nan matrimonio perfecto, cu paketenan personaliza.
Di e forma ey, Renaissance Wind Creek Aruba Resort ta sigui evoluciona y ta anuncia nan apertura di un oficina nobo pa asina por ofrece e mihor servicio na parehanan cu ta drenta nan enlace di matrimonio.
Renaissance Aruba ta reconoci como e hotel preferi pa celebracionnan romantico, ofreciendo parehanan experiencianan di matrimonio inolvidabel. For di ceremonianan intimo riba e isla priva cu ta rondona pa nos lama color blauw, flamingonan color ros y santo color blanco tambe nos ta ofrece celebracionnan elegante cu diferente espacionan excepcional pa un experiencia unico.
Renaissance Aruba ta reconoci mundialmente pa e hotel cu ta brinda matrimonio inolvidabel pa nos huesped nan internacional y nos enfoque lo continua pa sirbi nos pueblo di Aruba den e Ballroom di Renaissance Convention Center.
Nan ta ofrece diferente pakete di matrimonio incluyendo areglonan unico y inovador. For di ceremonianan romantico riba nos isla priva, brunch y recepcionnan elegante y celebracionnan luhoso den e ballroom, parehanan por scoge un experiencia cu ta refleha nan estilo personal, tradicionnan y vision.
E apertura di e oficina nobo ta pa acomoda e expectativanan moderno, y e demanda pa un planificacion di matrimonio personalisa. E espacio aki ta permiti e expertonan di boda pa presenta e diferente localidad y paketenan disponibel, ofrece tastings di nan menu personalisa, y guia nan durante cada paso pa haci e día aki uno special.
“Parehanan di awendia ta busca mas cu solamente un lugar bunita, nan ta busca un experiencia. Sea cu ta un celebracion intimo riba Renaissance Island of un casamento luhoso den Renaissance Convention Center, nos meta ta pa haci cada celebracion extraordinario,” ta loke Paul Gielen, General Manager di Renaissance Wind Creek Aruba Resort a declara.
Esnan cu lo atende e oficina nobo aki ta e expertonan Marshilyne, Dhalia y Richelyn.
https://diario.aw/categories/noticia/general/hopi-reaccion-riba-e-bunita-oficina-nobo-pa-atende-asuntonan-di-matrimonio-na-renaissance-convention-center#sigProIdd261e3154d