ORANJESTAD (AAN): Den nos bida priva y profesional tin biaha hende ta haya nan mes den un intercambio di palabra cu
ta yega na dado momento den un discusion y pleito. Y e hende ta stop di papia cu otro. Un conflicto ta nace. Un conflicto por daña e relacion entre amigo-, trahadonan, trahado y hefe, bisiña of te hasta den un famia. Tin biaha e hende no sa mas kico nan tin cu haci pa resolve e conflicto. E ora e conflicto ta sigui sin solucion.
Asina un bon relacion bo tabata tin hopi aña ta wordo daña. Un conflicto por ta hopi emocional pa hende principalmente, si ta un conflicto na trabao, den un famia of cu un bisiña. Si ningun hende ta haci algo pa resolve e conflicto, e ta sigui y e consecuencianan por ta grandi. Tin biaha hende ta bira malo, nan no por traha mas y ta tuma AO of nan ta tuma retiro for di trabao.
Intermediacion (‘Mediation’) ta un manera di resolve un conflicto. Si hende mes no sa kico pa haci nan ta acerca un mediado (mediator) pa yuda nan. Un mediado (mediator) ta independiente y e ta percura cu un conflicto entre hende nan ta wordo adresa y e hende mes ta busca un solucion pa nan conflicto. E mediado (mediator) no ta tuma parti, e ta uza intervencion-/habilidadnan pa yuda hende compronde otro mas miho y asina yega na un solucion pa nan conflicto.
Tin momento di un consulta of negociacion cu bo ta sinti e otro persona ta keda riba su punto y no kier wak bo banda di e situacion. Pero boso no tin un conflicto ainda. Den un situacion asina habilidadnan di intermediacion por yuda tambe pa "get bek on track" cu un combersacion of negociacion.
Cu habilidadnan di intermediacion hende por resolve un conflicto of percura cu un situacion no ta bira un conflicto y ni ta escala.
Un di e trainernan di e curso, Barbara Abdoelkariem a nace na Hulanda y tin su roots di Arubiano y Surinam. Na e momento aki Barbara ta un hurista kende tin hopi experencia, tanto na Hulanda y na Aruba. Barbara ta specialisa den derecho ambiental (Omgevingsrecht), Ley di Legislacion Social y Participacion (Sociale wetgeving en Participatiewet).
E fecha di e Basis opleiding mediation Aruba ta dia 16 di november 2026 te cu 23 di november 2026.
E fecha di e ‘specialisatie Mediation in Strafzaken Aruba’ ta for di dia 24 di november 2026 te cu dia 27 di november 2026 y ta wordo duna hunto cu señora Lisette Poppen y sra mr. Simona La Fleur cu ta mediadonan. ‘Mediators in Strafzaken na Curaçao’ y miembro di CMA. Durante e cursonan, sra Lupita Bernabela y coleganan ta duna nan servicio na e participantenan como actornan den formacion (trainingsacteurs).