Hopi habitante di Noord “A bay caya” move, haci deporte y hopi mas!

ORANJESTAD (AAN) – Manera ta conoci IBiSA y CEDE Aruba a uni den un “joint venture” pa haci comunidad di Noord conciente kico tur nan bario tin di ofrece, unda a organiza e prome actividad yama “Ban Caya”.

A trece mucho mas cu movecion y deporte Diadomingo cu a pasa den e distrito di Noord, entre otro na Compleho Deportivo Frans Figaroa.

Ban Caya a wordo crea door di IBiSA CEDE Aruba y Gobierno, den cual a combina movecion pero a haci henter e comunidad di Noord conciente, di kico e distrito aki tin pa ofrece, no solamente den deporte pero diferente organizacion, fundacion, cu por duna nan conocimento na henter e bario di Noord, y den e caso aki haci di Centro di Bario Noord e centro principal na unda tur hende ta topa y unda tur hende por trece nan famia hunto manera e idea ta.

Centro di Bario Noord ta un centro activo caba, no solamente pa adulto pero pa grupo di hoben, y esaki cu hunto nan por haci cosnan positivo dunando e stempel aki, e semia den e bario di Noord, pa esaki sigui despues.

Ban Move den cayanan di Noord a cuminza pa 3 or di atardi te cu 7 or di anochi y varios organisacion a cuminza cu e evento como tambe fundacionnan deportivo cu ta riba caya haciendo deporte.

IBiSA hunto cu Kleuterschoolnan a organisa futbol riba caya. A bin tambe cu un health street na cu oportunidad pa, entre otro, sa kico ta come y bebe saludable, cu presencia di nutricionistanan, masahistanan, personanan cu ta haci pedicure y manicure riba caya, fuera di locual ta deporte, tambe tabata tin aporte di recreacion personal, manera meditacion, yoga cu tambe ta yuda bo salud a wordo treci dilanti.

Aunke e acogida no tabata asina grandi manera a spera, como cu esaki ta e prome biaha, por bisa cu e tabata bon. Riba combinacion di potret por aprecia algun momento di “Ban Caya”!