Edward Maduro Presidente di SADA:
ORANJESTAD (AAN) – Lider di Sindicato di Aduana, Edward Maduro, den un entrevista cu DIARIO, a duna di conoce cu lamentablemente, Diabierna, un biaha mas, e trahadornan a haya nan mes forza na tene accion, e biaha aki atardi di 1’or pa 4’or. E motibo di esaki ta cu e Director no kier duna cara y scucha e trahadornan.
Ta lamentabel, el a bisa, cu e trahadornan a manda carta pidi un werkoverleg cu tanto e hefe di seccion como cu e director, pa asina trece nan malcontento dilanti, pero envez di actua como un bon director, un bon hefe, bin scucha su trahadornan a opta pa no haci esaki, sino cu a opta pa manda un invitacion individual y menasante, bisando e trahadornan cu si nan no bin na e reunion aki y sin un representante sindical como asesor, nan lo wordo raporta y cuminza un proceso disciplinario contra cada un di nan.
Esey tambe a sosode, cu e director a manda un notificacion na cada un cu lo start un proceso disciplinario, simplemente pasobra e no kier a scucha nan.
“Por wak con na 2023 nos tin cu pasa den tipo di intimidacion asina di un director, y e ta lamentable pasobra e ta demostra su falta di profesionalismo, pasobra ta hopi no profesional pa haci e tipo di actonan aki contra e trahadornan, simplemente pasobra e trahadornan kier a wordo scucha. E ta hopi tristo pa bisa, pero nos tin cu biba cu e realidad”!
Maduro a agrega cu diahuebs caba nan a indica cu mirando cu Diaranzon no a haya ningun indicacion cu e trahadornan lo a wordo yama na reunion, e sindicato a indica Diahuebs den un carta cu si pa Diabierna merdia 12’or no haya un reunion cu e trahadornan, sea conoci cu nan lo sali 1’or y esey a sosode.
“Mester bisa si, cu e director a manda un carta cu no mucho contenido y despues casi pa 12 or el a manda un mail, cu un invitacion pa sindicato SADA pa un reunion Diamars awo. Pero ora cu nos a reuni cu e miembronan pa 1’or di atardi durante e accion, pasobra den e carta e director a pidi pa no walk out pero sigui duna e servicio, e trahadornan a bisa cu si e reunion di Diamars (awe) ta inclui nan, nan lo bay traha di biaha. Lamentablemente, e mail ey a bay banda di 2.15 pm y te dia di awe nan no a haya un reaccion di esey. Pues e trahadornan a keda afo te 4’or pa motibo di un director cu no ta capaz di maneha un departamento”, Edward Maduro, lider sindical di SADA a bisa.
