Aña di Parlamento 2023-2024 den un situacion mundial instabil
*Un Parlamento full time mester por mantene hora di oficina
*Pueblo como Doño di Trabou mester haya calidad pa su placa
ORANJESTAD (AAN) — Continuamente por tuma nota di argumentonan di Miembronan di Parlamento supuestamente basa riba trabou cu ta wordo haci dor di gobernantenan cu Pueblo tin bon herment pa controla debidamente.
Ora papia di produccion politico na Aruba, pensamento directamente ta bay pa e cuerpo cu ta ehecuta e trabou diariamente, pues e Prome Ministro, siete Ministro y un Ministro Plenipotenciario na Hulanda.
E sistema di gobernacion (mas ainda den un mundo moderno di informacion rapido) ta facil pa sigui y asina analisa.
Sinembargo, no ta Conseho di Ministro, ta e unico gobernante di acuerdo cu Trias Politica. E grupo di gobernante directo cu Pueblo ta nombra ta Parlamento, cu ta wordo paga dor di Pueblo pa asegura un bon calidad di gobernacion.
Pueblo no ta paga Parlamento pa funciona como Polis di Gobierno, pero pa Parlamento dicidi y controla si Aruba ta wordo goberna a base di Ley cu ta conta pa Parlamento tambe.
Parlamento mester vigila e placa cu ta wordo gasta, pero no ta depende di Gobierno pa un Ley pasa, pasobra tur Miembro di Parlamento mes por traha un Ley y Parlamento ta e unico instancia na Aruba cu por cambia Ley.
Den pasado Parlamento tabata un Puesto di Honor y ta un suma modera Miembronan di Parlamento tabata ricibi pa traha pa Pueblo.
A dicidi cu pa mas y mihor trabou Pueblo di Aruba mester tuma Parlamento den su servicio 24 hora pa diay awe esaki ta encera cu Pueblo na 2023 mester pone segun calculacion hancra den Presupuesto di Parlamento, un suma di mas cu 13 Miyon disposnibel pa paga miembronan di Parlamento.
E momento a yega, pa Parlamento cuminsa traha manera den mundo empresarial, caminda produccion ta dicidi riba entrada cu e persona ta ricibi.
Ta increibel cuanto placa di Pueblo ta bay na compensacion pa transportacion. Pueblo mester paga pa biahenan cu te awe no a produci un proyecto pa Aruba.
Ridiculo ta e biahenan pa asisti na reunionnan caminda por topa cu representantenan di paisnan cu ta ignora democracia.
Pueblo ta paga Parlamento pa traha manera tur otro trahador cu un horario. Kico lo pasa na Aruba si tur empresa dicidi cu e trahadornan por drenta y sali ora nan kier?
Na momento cu e horario “normal”pasa tur hende no ta bay cas pa bolbe e siguiente dia. Ta sigui reuni y mester di cuminda.
Cu por tin un asunto cu ta exigi e urgencia di reuni y sigui reuni, nos no kier pone na duda. Pero pakico Parlamento no por reuni ocho hora pa dia y reparti loke ta bay papia?
Ta paga pa asistencia tecnico di Miembronan di Parlamento. Algo cu nos ta aplaudi pasobra nan mester ta capaz pa comprende contenido di leynan cu ta dicidi con nan mester traha pero tambe di kico nan ta papia y kico e materia ta realmente.
Esaki pa e calidad di trabou ta satisfactorio.
Kico ta satisfactorio si hasta condena di Huez no por dicidi pa e moral cu por spera den Parlamento?
Apertura di Aña di Parlamento ta topa Aruba y mundo den problema serio. Instabilidad mundial. Instabilidad den Reino. Problemanan serio cu tur loke por ta problema, di condicionnan di tempo cu ta menasa hende hunto cu e peligro di guera pa no papia mes di aumentonan mundial di prijs cu ta menasa e cartera di e ciudadano.
Na apertura di Aña di Parlamento 2023, kico mester spera di un representante di Pueblo den e Colegio Halto cu Parlamento ta den gobernacion di nos pais?
Buskeda di mas voto pa e proximo eleccion? Crecemento politico pa alcansa adoracion di parti di Pueblo?
Un situacion mundial serio ta exigi pa politica baha for di nubia y no uza Parlamento como pedestal politico.
Un analisis di realidad ta mustra con fayo di Parlamento a produci e debe nacional di Aruba. Fayo di Parlamento a permiti escandalonan manera Avestrus. Parlamento tin e poder y mester indaga den tur loke ta pasa cu placa, tereno, bienestar di Pueblo.
DIARIO ta tene su mes na haltura di e forma cu Raad van Advies, Algemene Rekenkamer Aruba, Conseho Social Economico, ta duna sosten na e proceso legal di e gobernacion di Aruba.
Na un momento critico pa mundo, den un transicion pa futuro, Parlamento mester refleha austeridad, entrega na democracia y Pueblo di Aruba cu ta motibo di existencia di Parlamento, e curazon di democracia cu periodismo tin e deber di vigila!
