Hopi fiel siguidor a keda contento cu yegada di relikia nobo di Dr. Jose Gregorio Hernandez

ORANJESTAD (AAN): Un cantidad di fiel siguidor di Dr. Jose Gregorio Hernandez, como tambe demas fielnan Catolico tabata presente Diasabra atardi,

ora cu a sali cu un Procesion di Auto, cu e relikia recien obteni awor cu Dr. Jose Gregorio Hernandez a wordo proclama como Beato.

   Tur cos a cuminza na Pro Catedral San Francisco de Asis na Playa, cu a sigui cu e Procesion te na Sitio di Oracion Dr. Jose Gregorio Hernandez na Tanki Leendert.

   Fundacion Dr. Jose Gregorio Hernandez a considera esaki un dia grandi, y porfin nan a ricibi e relikia.   Den un entrevista cu Carmen Russel-Franken di e Fundacion, el a bisa cu pa 54 aña haciendo oracion y pidiendo Vaticano pa e beatificacion di Dr. Jose Gregorio.

   Esey a bira realidad dia 30 di April 2021, y awor Aruba a ricibi su relikia cu a wordo bendiciona.

   Diasabra a cuminza cu un Misa na Pro Catedral San Francisco de Asis na Playa, unda Vicario a haci un misa solem.  Despues a sali den procesion pa hibe na Tanki Leendert.  Aki Vicario a bay cu esaki den su man for di Playa te Tanki Leendert.

   Aki a tene un ceremonia y oracion chikito, sigui cu un brindis pa esnan presente.

   Tur Diaranson nan tin sea oracion of misa na Sitio di Oracion Dr. Jose Gregorio Hernandez na Tanki Leendert.