Minister Rocco Tjon a anuncia:
ORANJESTAD (AAN): Minister Rocco Tjon durante un conferencia di prensa diamars mainta a referi tambe na dos topico cu tin di haber cu e tereno di husticia.
El a bisa cu manera ta conoci, for di inicio a cuminsa cu diferente proyecto pa haci tur e wardanan di polis y garashi di polis limpi ya cu tabata tin hopi auto ubica eynan.
A señala cu e asunto aki ta trece varios reto cu ne. Na prome lugar, e parti di administracion, pero di otro banda, cada bes c'un piesa wordo horta, un auto ta wordo destrui, Land Aruba tin di para responsabel pa esaki. Esaki ta encera un inversion grandi, a remarca.
E mandatario a sigui bisa cu antes, un compania priva tabata wordo paga pa busca e autonan aki y e tabata haya tambe locual un otro compania ta pag'e pa cu e autonan aki. Ya caba a restrutura esaki y ta 'deal' directamente c'un compania cu ta tuma e autonan y Land Aruba aworaki ta genera entrada na esaki. Tur esaki den cuadro di ley, a enfatisa.
Ta bay restructura esaki dentro di poco y den cuadro di esaki e minister a anuncia cu segun 'timeline', na Juni di e aña aki, lo bin un destaho publico caminda tur compania por participa. Nan lo ta bay bira e instancia cu lo ta encarga cu e parti aki, a splica.
Segun Tjon, esaki tin balor agrega pa Pais Aruba pa diferente motibo. E ta bay encera menos capacidad di Cuerpo Policial caminda por bay atende nan 'core business' mesora. Di otro banda e ta bay percura tambe cu Land Aruba no ta bay para responsabel mas ora cu daño ta wordo haci na e vehiculonan aki y pa e motibo ey ta bay encamina e proceso aki.
Den cuadro di ley, a señala, e 'landsverodening wegverkeer' ta duna e posibilidad aki, pero mester tene cuenta cu diferente punto, Minister Rocco Tjon a duna di conoce.
Mester tene cuenta cu e tereno caminda ta bay indica cu e vehiculonan aki ta bay wordo ubica despues cu nan ta wordo tuma den beslag. Tambe mester tene cuenta cu e aspecto di seguridad pa e propiedadnan aki ta debidamente protehi y mester bay defini cuanto esaki ta bay costa pa cada dia c'un auto wordo poni na e sitio ey, e mandatario a indica.
Pa motibo di scarcedad di espacio, hopi bes, e agentenan policial ta haya nan mes stroba di kita un auto for di caminda door cu e wardanan ta yen caba, door cu no tin espacio. Un bes cu kita un auto for di caminda como Pais Aruba tin cu para responsabel p' esaki tambe, a bisa.
Esaki ta e motibo pakico ta bay scoge pa sub-contrata esaki y na Juni e destaho publico lo wordo anuncia, Minister Tjon a declara.
