Hopi awa a cay riba Diamars mainta na Aruba

ORANJESTAD (AAN): Diamars for di madruga caba, awacero a cuminza cay riba Aruba.  Un cobertura amplio di nubia cu ta cubri gran parti di islanan ABC,

como tambe costa panort di Venezuela, tabata rek y yega te na mey-mey di Caribe.

   Lama tabata basta bruto na costa pariba y tambe costa panort di Aruba.  Algun caminda olanan tabata yega te na 7 y 10 pia.

   National Hurricane Center tambe ta vigilando e Disturbio aki di cerca, principalmente mirando e hecho cu e ta birando hopi bon organiza, y tin pronostico cu ora e ta mas pabao di Aruba, pa fin di siman venidero e lo por desaroya, haya mas forza y bira un Depresion Tropical.

   Kizas pa Diabierna of Diasabra e lo por haya nomber di Tormenta Tropical Ida.

   Riba Diamars, por a mira cu e awacero a laga basta area inunda.  Mainta a registra 4.4 mm di awacero, y merdia a registra 1.3 mm, pues hunto el a bira 5.7 mm.

   Sinembargo otro fuente ta menciona cu Aruba a haya 12.8 mm di awacero.  Y por a mira cu un biaha mas e mesun lugarnan na e.o. Tanki Flip ta yena cu awa y trafico ta bira hopi lento mes.