Minister Presidente Evelyn Wever-Croes: - *No cay den e tipo di speculacion aki
ORANJESTAD (AAN) – Minister Presidente, mr. Evelyn Wever-Croes, den conferencia di prensa di Diamars, a nenga rotundamente cu Aruba lo tuma entre 300 pa 400 refugiado di Afghanistan.
El a refuta e noticia speculativo aki cu a circula Dialuna den e comunidad, y cu ta completamente falso den tur sentido. Asina e dignatario a bisa den forma tahante.
“Lamentablemente, nos tur por mira kico ta sosodiendo na Afghanistan y nos, asina leu di ayanan, unico cos cu nos por haci ta tene nan den oracion y pensamento, y cu pronto nan situacion por normaliza. Ta asina cu nos por mira con hopi persona ta purba di scapa, di huy for di Afghanistan, na e momentonan aki, y varios pais ta yudando nan den esaki.
“ Pa nos, ora bo ta asina leu, bo por wak’e den television, bo por cambia di canal wak algo diferente, pero pa nan cu ta biba den dje, e ta un situacion hopi dificil. Desde akinan, un biaha mas, nos oracion y pensamento ta na tur e hendenan aki”, Prome Minister a expresa.
E dignatario a referi na e rumor cu tabata tin dialuna, circulando den comunidad, cu Aruba lo ta un di e paisnan cu lo duna auxilio na un grupo di 300 pa 400 persona di Afghanistan, como refugiado.
“ E noticia aki no ta corecto! E no ta corecto den ningun sentido di e palabra. Aruba no ta e pais yama pa por duna asilo na refugiadonan di Afghanistan. Nos a compronde si cu Colombia ta un di e paisnan mas cerca cu ta dunando e refugio ey, pendiente e entrada di e personanan aki na Merca, pues nos ta laga esaki den man di paisnan grandi cu por cargue. Ademas, Aruba cu e situacion di Venezuela, ya caba a pasa den un cantidad masha grandi y importante di personanan cu a huy di nan pais caba, y nos ta purba di atende cu e retonan ey. Na e momentonan aki pues, esaki no ta un noticia corecto, y mirando tur e retonan cu nos tin nos dilanti, e pandemia cu nos ta aden, e situacion di covid cu nos ta aden y cu ta hopi critico, laga nos keda cu cabes frio y no cay den e tipo di temanan aki”, Minister Presidente Evelyn Wever-Croes a remarca.
