ORANJESTAD (AAN) – Minister Presidente a menciona e instancianan cu cual a reuni Diamars, den e parti di sesionnan cu stakeholders, cu ainda ta continua.
Na prome lugar, a reuni cu Cruz Cora cu tabata un bon reunion, segun e mandatario a acentua, unda el a gradici tur e trabaonan cu Cruz Cora a haci durante e pandemia.
“Nan a sirbi entre 7 mil cu 10 mil famia cu paketenan di cuminda, y esey ta algo hopi grandi”, e dignatario a expresa. “Den total nan a sirbi tambe cien mil cuminda cayente, na esnan cu tabata tin mester di dje”, el a agrega.
Ademas nan a papia tocante diferente reto cu Cruz Cora ta enfrenta, y con por yega na un miho cooperacion entre Cruz Cora y Gobierno pa yuda esnan di mas vulnerable den nos comunidad, e dignatario a subraya.
Seguidamente a reuni cu Fundacion Atelier’89 cu a trece dilanti su pasion grandi pa arte, e retonan cu nan ta confronta pero tambe sugerencianan.
Un punto hopi importante cu nan a expone, e dignatario a splica, ta pa mescos cu gobierno ta inclui deporte y lesnan di canto na scol, inclui arte tambe den e curriculum, pasobra hopi di nos muchanan por tin e talento artistico y asina un mucha por expresa arte na un forma apasiona y asina por kita un mucha for di riba caya y evita e riesgo cu e lo por bay den mal caminda.
Nan a indica tambe cu tur luna nan tin exposicion cu ta gratis pa scolnan, y gobierno ta bay busca manera pa e muchanan por bishita e galeria di Atelier’89 mas frecuentemente.
Tambe a reuni cu Fundacion Movimento ta Bida, cu ta un instancia cu ta dedica su mes na mehora e calidad di bida di e adultonan mayor. E mandatario a splica cu manera nan a trece dilanti varios persona tin e impresion cu ora di yega edad di pension, por fin no tin nodi traha mas, no tin dolor di cabes mas, y e tin cu soya den un stul. “Pero basicamente loke e fundacion aki ta bisa nos, ta pa cuminza prepara prome cu edad di pension yega caba, na kico si bo ta bay haci despues di edad di pension. Pasobra sinta den un stul y soya, esey no ta mucho productivo”, e dignatario a menciona. E fundacion a mustra kico tur nan ta haci pa tene e adultonan mayor al dia, cu e parti di digitalizacion y tambe eventonan social y movimento pa tene nan saludable. E programa cu nan a presenta den e reunion e dignatario ta haye sumamente interesante, y loke nan mester ta mas sosten pa asina por yuda mas adulto mayor. “Nan a pidi nos tambe pa nos formaliza e luna di October como luna di hende grandi, y esey ta algo cu tambe nos ta bay traha riba dje”, Formador Wever-Croes a relata.
Finalmente, Formador a reuni cu Asociacion di Ingeniero y Arkitectonan Arubano (AIAA), “cual ta asisti nos como stakeholder den aspectonan di desaroyo, construccion, etc. Nan a trece cinco punto padilanti, cu nan ta pidi atencion di gobierno. Nan ta puntonan conoci y importante ta pa regula e mercado aki, pasobra con cu bay bin, nos tin hopi hoben cu ta studiando sea pa Contratista, Ingeniero, Arkitecto y tin biaha e hobennan ora cu nan ta na Hulanda keda cla cu estudio, nan no ta haya mucho atractivo pa bin Aruba bek, mirando por ehemplo cu na Aruba bo no mester di un estudio pa ta un contratista, Arkitecto of Ingeniero practicando den field. Nan puntonan ta valido y nos lo sigui traha hunto cu nan riba e diferente retonan cu nan a trece padilanti”, Formador Evelyn Wever-Croes a relata.
