Honrando e pioneronan nos ta renoba nos compromiso cu un turismo sostenibel y inclusivo

Parlamentario Jennifer Arends-Reyes:

ORANJESTAD (AAN) Lider di fraccion parlamentario di AVP y presidente di comision di turismo, Jennifer Arends-Reyes, hunto cu otro miembronan di fraccion a atende diaranson ultimo e ceremonia pa inclusion di Sr. Ike Cohen (dfm) na e monumento riba Plaza Turismo caminda varios pionero di e industria ta aparece como reconocemento.

   E posicion di prestigio cu Aruba ta ocupa den turismo na nivel mundial, ta danki na henter su pueblo, paso cada un di nos ta aporta directa of indirectamente na e ‘producto Aruba’. Sinembargo, tin un grupo di visionario cu a reconoce e potencial y a traha duro den su desaroyo y Sr. Cohen sigur ta un di nan.

Arends-Reyes a enfatisa cu: “Nos pioneronan di turismo a lanta un fundeshi solido riba cua Aruba a bira un destino mundial. Honrando nan di e manera aki ta un muestra di nos gratitud y ta motiva nos pa sigui inverti den un turismo sostenibel y inclusivo.”

   E ceremonia, cu ta conta cu presencia di Gobernador di Aruba,  Ministernan di gabinete di gobierno y otro dignitario, a duna un tono solemne y inspirador. Varios miembro di Fraccion di AVP tabata presente pa mustra nan solidaridad y reconocemento na e bida, memoria y legado di Sr. Cohen, mescos di tur otro lider di turismo, tanto di ayera como di awe.

   Arends-Reyes, den su rol como presidente di Comision di Turismo, a felicita gobierno y Aruba Tourism Authority pa e paso importante aki pa amplia y fortalece e lista di honradonan. “Nos ta gradici e esfuersonan pa sigui reconoce tur cu a lanta nos sector turistico. Nos ta mira e monumento manera un simbolo di gratitud colectivo pa tur generacion cu a traha pa posiciona Aruba den mapa mundial di turismo,” segun e parlamentario.

   Fraccion di AVP ta sigui comprometi na defende y fortifica un politica di turismo cu ta honra pasado, pero cu ta mira firme na futuro di nos pais.