ORANJESTAD (AAN): E stationschip di Defensa Hulandes actualmente den Lama Caribe, esta Zr.Ms. Friesland, a bolbe logra intercepta un cargamento di droga.
E biaha aki a logra confisca 318 kilo di cocaina, durante un accion riba Lama Grandi cu a socede Dialuna 18 di Augustus, esta siman pasa. Pero apenas Diahuebs a anuncia esaki oficialmente. Esey a bira e di ocho biaha cu e barco Friesland ta logra den captura di droga.
Ta esnan abordo di e barco Friesland mes e anochi ey nabegando riba Lama Caribe, a detecta un boto sospechoso. E ta un speedboat conoci como ‘Go-Fast’, cu ta wordo hopi uza den contrabando di droga. Mirando su localidad, e barco Friesland a saca dos di su botonan di intercepcion, esta FRISC pa nan bay rumbo pa e Go-Fast.
Ora cu e narcotraficantenan a mira e dos FRISC den nan direccion, nan a cuminza desvia pa purba huy, y a hasta cuminza benta bultonan di droga den lama. Toch na final e Go-Fast no por a sigui mas, y a logra wanta esnan abordo. E relato di Defensa Hulandes no ta menciona cuanto hende tabatin den e Go-Fast, ni e nacionalidadnan. Pero riba imagen a mira cu ta parce cu nan tin 3 hende abordo. Tambe a nota cu e Go-Fast ta ekipa cu 3 Outboard Engine, y ta yena cu bari di plastico cu combustibel.
Pero Defensa si a bisa cu nan a logra di saca tur bulto for di lama, y e peso a yega na 318 kilo di cocaina.
Barco Friesland a topa cu un cutter di US Coast Guard, kendenan a tuma e droga pa asina bay destrui esaki.
Friesland ta desde luna di Mei activo den region Caribense. Combatimento di narcotrafico ta un di su tareanan di Defensa den Caribe Hulandes. Nan ta colabora tambe cu Wardacosta di Caribe Hulandes, y cu US Coast Guard.
