Homber na Uganda cu a produci 102 yiu porfin a bisa cu ya ta suficiente

KAMPALA: E homber Musa Hasahya Kesera biba na Uganda, ta tata di 102 yiu y e ta lucha pa mantene nan, hasta tin biaha ta dificil pa corda nan nomber.

   Awor cu 68 aña di edad, e ta na cabez di un famia di 12 muher, 102 yiu, y 578 nieto. Su yiu di mas jong tin 10 aña, y esun di mas grandi tin 50 aña.

   Musa Hasahya Kesera a hasta converti su mes den un atraccion na e pueblo di Bugisa, cu ta keda banda pariba na Uganda.  Pero awor e kier pa tur esey stop.  “Mi a siña di mi actitud iresponsable di a traha asina hopi yiu cu awor mi no por cuida nan,” el a bisa.

   Su famia grandi ta biba den un cas hopi decai, cu un dak di bleki, y como 20 pico cabana traha di torto situa eybanda.

   “Cu mi salud debil y menos di un hectare di tereno pa un famia grandi asina, dos di mi casa ya a bay pasobra mi no por a cria nan cu lo mas esencial, manera cuminda, educacion, ni paña,” e tata di famia cu aworaki ta desemplea, a laga sa.

   Pa evita cu su famia ta sigui crece, awor su casanan ta bebe anticonceptivo.  Pasobra e mes no ta cuida su mes.

   Poligamia ta legal na Uganda: Musa Hasahya Kesera a casa pa prome biaha na 1972, tempo e tabatin 17 aña, via un ceremonia tradicional.  Su prome yiu a nace un aña despues.

   “Como cu nos tabata solamente dos yiu homber (den su famia), mi ruman homber, mi tata, y mi amigonan a consehami pa mi casa cu varios muher pa asina haya hopi yiu y aumenta nos patrimonio di famia,” el a splica.

   Atrai pa nan status di bendedor di bestia y carnicero, hopi hende den pueblo a bin ofrece e man di nan yiu muher, algun di nan ainda menor di edad (un practica awor prohibi desde 1995).

   Awor cu añanan a pasa, ya e no por ni identifica su mesun yiunan.

   “Mi ta corda solamente e nomber di esun cu a nace prome, y e ultimo, mi no ta corda nomber di mayoria di e otronan,” el a confesa, revisando un buki pa haya detaye di nan nacementonan. “Ta nan mama ta esnan cu ta yudami identifica nan,” el a admiti.

   E homber a confesa, cu tin biaha e ta hasta lubida nomber di algun di su casanan.  E ora e tin di pidi un di su yiunan, Shaban Magino, un docente di 30 aña di edad, pa yude fix algun asunto di famia.  E ta un di su poco yiunan cu a bay y finaliza scol.

   Pa por resolve disputa, cu ta presenta semper den famia, nan ta organiza un reunion cada luna pa atende tur asunto.