Maria Villamarin ta un partera nobo cu varios logro academico

Na Verloskundigen Praktijk Duna Lus

ORANJESTAD (AAN): Aruba a haya un partera nobo, esta Maria Villamarin Ramirez.

   Algo interesante ta e hecho cu na Hulanda mes tin un scarcedad di partera e momento aki, y awor Aruba a haya su di 8 partera! Esaki ta bin cu un beneficio grandi pa Aruba.

   Maria su estudio a cuminsa na 2015 na Academie Verloskunde Amsterdam (AVAG). Un di su 2 buitenlandse stages Maria a core na e grupo di ‘Duna Lus’ na Aruba na 2018, cual el a caba exitosamente.

   Aki ta mira un partera kende por domina e 4 idiomanan, ta eficiente cu un pasion pa su trabao. Su otro buitenlandse stage Maria a elabore na Inglatera. Aki el a dicidi di analisa e database di un estudio grandi (Babies Born Better) cual ainda ta tumando luga na e momentonan aki na Europa. E estudio aki lo evalua con e pashentnan ta experiencia e cuido medico durante nan embaraso y parto. Un total di 26 pais ta participa na e estudio aki.

   Maria tabata asina inspira cu el a dicidi pa haci su afstudeer scriptie basa riba e estudio aki y el a presenta esaki na Lisboa (From birth to health Conference) na unda el a gana hunto cu su colega di estudio e ‘Best Abstract’.

   Na 2020 Maria a gradua como partera y a cuminsa su carera na Hulanda unda el a traha na diferente praktijk. Na 2021 el a tuma un training riba Anticonceptie counseling/plaatsen. Na e momento aki ta haciendo tur preparacion pa Maria por cuminsa duna e servicio aki tambe na Duna Lus, segun Xochi Woorts a indica.

   Na Januari 2021 Maria e dicidi di bin Aruba back y ya tin 10 luna ta traha na Duna Lus, awo cu el a caba di finalisa su contract cu AZV e ta spera di por duna su aporte na e sector medico di Aruba.