Homber Hulandes gara na Aeropuerto di Santo Domingo cu 99 bolita di cocaina den stoma

SANTO DOMINGO: Accion contra narcotrafico ta birando mas fuerte na e pais di merengue. 

E cantidad di droga cu autoridadnan Dominicano a confisca den ultimo 20 luna, ta sobrepasa tur loke nan a yega di confisca den 16 aña di tempo.

   Durante luna di Juni, autoridadnan a actua riba lama y a logra di intercepta ocho accion di transporte cu speedboat tipo Go-Fast cu tabata yena cu cocaina yegando e pais.

   Pero toch keto bay ta sigui captura droga na Aeropuerto, riba caya, na cruzada di frontera, y mucho mas.

   Ta parce cu keto bay ta haci uso di mula di droga pa haci viahe cu droga.  Recien departamento anti-droga DNCD a detene un pasahero Hulandes na Aeropuerto Internacional Las Americas, kende tabata actua masha nervioso mes prome cu su vuelo.

   Oficialnan a ripara esaki mesora, y a dicidi na bay papia cune, y esaki a pone e pasahero bira aun mas nervioso y cuminza soda.

   Nan a dicidi na bay cune den un oficina pa interogacion, y asina a bin haya sa cu e tin un monton di bolita scondi den su stoma.

   Esey a pone cu nan a detene e homber Hulandes aki di 43 aña prome cu el a subi su vuelo rumbo pa Belgica.  Asina a hibe pa saca X-Ray di su stoma, y a bin nota cu esaki ta full yen.

   Asina a sigui cu e proceso pa bay saca e bolitanan aki via e ruta normal.   Despues di algun dia el a saca un total di 99 bolita di su stoma na Hospital Central de las Fuerzas Armadas.  E droga aki a logra haya un peso di 1.2 kilo.

   Otro forma di sconde droga: Algo inusual ta e hecho cu awendia e criminalnan ta haci uso di hopi imaginacion pa busca forma pa sconde droga, pensando cu autoridad lo no bay pensa hamas di busca eynan pa droga.

   Un ehemplo di esaki ta loke Departamento Anti-Droga di DNCD na Republica Dominicana a bin topa cune, ora di haya dos paki di cocaina cu tabata scondi den parti paden di dos stoof electrico, na Aeropuerto Internacional de las Americas.

   Droga den Beach Chairs: Oficialnan trahando den e area di un di e depositonan di e Terminal, a nota cu e cacho anti-droga a detecta algo raro den dos caha cu tabata rumbo pa Merca.

   Ora e oficialnan a bay habri e cahanan aki, a bin dos stoof electrico den cual tabatin un total di 490 gram di cocaina scondi.  E droga a wordo manda pa un muher Dominicano na un homber cu ta biba na Park Terrace na Bridgeport (Connecticut) na Merca.

   Cinco dia despues na mesun Aeropuerto, a bin haya mas di 1 kilo di cocaina scondi den e tubonan di dos Beach Chairs.  Danki na e cacho anti-droga a bin nota cu lo tin algo den e cahanan aki.  Asina a bin haya e droga.  E stulnan di beach aki tabata wordo manda na adres di un homber na Greenwood Street na Dorchester (Massachusetts) na Merca.

   Droga como battery-pack: Tambe e cacho anti-droga di DNCD a detecta holor fuerte ta bin for di un caha mas chikito.  Ora di bay check esaki, a bin nota cu ta trata aki di un cargamento di 3 Smartphones.

   Pero ni maske kico nan a haci, e aparatonan aki no kier cende.  E ora a dicidi na kibra e seyo di e telefonnan aki, pa asina yega na e parti interno.

   Aki a bin ripara di con ningun di e 3 Smartphone no tabata cende.  Tur tres paki di bateria den e aparato tin nada di ‘bateria’ aden, djis full empaketa cu cocaina.

   Pues nan a disfraza e paki di cocaina den forma di ‘bateria’, y a hasta laga un ribbon-cable sali afo pa haci comosifuera e ta un bateria.

   Tur esaki a wordo confisca, y e trabao di sigui e guera contra narcotrafico awor ta sigui bira mas skerpi na Republica Dominicana.