Prepara bo cartera! --- *Consumidor ta pagando 4 pa 5 biaha mas hopi
ORANJESTAD (AAN): Manera ta conoci, mercado internacional a conoce un impacto grandi pa motibo di e situacion na nivel mundial. Por menciona por ehempel, e impacto cu Covid-19 a trece cu ne, e scarcedad di containernan cu a pone cu e prijsnan di flete a subi masha hopi mes afectando e mundo di importacion.
Mas recien, e guera di Rusia contra Ukraine tambe a afecta hopi industria na hopi pais. Por menciona cu e areanan unda esaki ta wordo sinti ta den un mayor inflacion pa motibo di e aumento den e prijs di e alimentonan como tambe den energia.
Por sigui menciona problemanan den e comercio internacional y den e cadenanan di abastecimento como tambe un incertidumbre mas grandi den e mercadonan.
Na Aruba, como un pais importado, cu ta depende di e comercio internacional, esaki sigur a trece cu ne un impacto grandi. Y esaki ta algo cu a bin ta afectando caba e poblacion door di e aumento den e prijs di hopi producto y servicio.
Y pa colmo, net aworaki cu por ehempel, prijs di gasolin a subi hopi na Aruba, banda di e otro aumentonan cu comunidad conoce caba, e pueblo di Aruba mester prepara atrobe e cartera pa por absorba of sobrebibi na mas aumentonan den e prijs di hopi producto comestibel.
Esey ta loke DIARIO a haya confirma e siman aki. Parce cu prijs di hopi producto nan prijs a subi y toch e 'wholesalenan' nan prijsnan tampoco ta scapa.
Un persona cu ta purba di bay un 'wholesale' pa cumpra un par di producto ta bin topa cu e situacion cu e prijs di e producto a subi drasticamente. Locual a wordo indica na DIARIO ta cu e consumidor na e momentonan aki ta pagando 4 pa 5 biaha mas hopi.
Te unda cu por sa, hopi hende na Aruba ainda ta sin trabao, otronan ta bida di nan pension pasobra nan ta hende grandi caba y no por traha pa motibo di nan salud. Tin personanan cu nan salario no ta 100% ainda. Otronan ta gana salario minimo y salario minimo manera ta conoci, no ta yega pa cubri hopi cos. Asina por sigui menciona.
Mientrastanto, Aruba mester a 'custumbra' na paga e prijs cu tin riba mercado. Pasobra no tin otro opcion. Prijs di galiña ta uno cu a subi masha hopi mes den e ultimo lunanan.
Ban pone otro ehempel riba un producto cu no ta basico, pero cu ta un luho. Un boter di whiskey di un marca hopi conoci, esaki ta bayendo di 100 florin pa 170 florin cerca un 'wholesale'. Esey ta un dato cu DIARIO a haya diamars confirma.
Ora di puntra riba prijs di otro productonan, e contesta tabata cu tur ta subi di prijs barbaramente.
