Hoben sin rijbewijs y pustando a bolter riba Green Corridor

A dal den auto inocente tambe

ORANJESTAD (AAN): Un accident registra Diadomingo anochi riba Green Corridor, na altura di e rotonde na Balashi, a laga un auto compacto Honda Fit color blauw scur gekentel riba caminda.

   Polis cu a yega rapidamente eynan, a bin tende di varios testigo cu e persona tras di stuur di e Honda Fit aki tabata pustando riba Green Corridor cu un otro auto, y den maniobranan pesimo yegando na e rotonde, el a bay den scual, y aki a dal den parti drechi dilanti di un Kia Rio color shinishi, y despues bolter y keda di banda asina.

   Polis a atende e hoben cu tabata tras di stuur di e Honda Fit cu number A-65982, y e mes a djis yega y bisa Polis cu e no tin rijbewijs.

   Testigonan a bisa cu e otro auto cu cual e tabata pustando, si a sigui core bay direccion San Nicolas y no a stop mes pa check kico a pasa ‘su brother’ den e Honda Fit blauw.

   Polis a tuma decision cu ta bay confisca e Honda Fit, ya laga Takelwagen bin busk’e di eybao pa bay cune.  Polis di Trafico awor ta atende e accident aki.  Si acaso e hoben haya un boet pasobra ta core sin rijbewijs, esaki lo ta un gasto di 550 Florin.  Kizas Aseguro tampoco lo no paga, pues e hoben y/of su mayornan tin di bay cubri gasto material cu e Kia Rio di number A-49520 a sufri tambe.