Ing. Marlon Croes, director di DOW:
ORANJESTAD (AAN) – Ing. Marlon Croes, director di Departamento di Obranan Publico (DOW), den un entrevista a declara cu loke ta e Planta di Bubali Plas (RWZI Bubali), ta rekeri di un inversion substancial pa por aumenta su capacidad hidraulico y tambe pa e capacidad pa e por handle e parti bacteriologico y nutriente.
Ing. Croes a agrega cu esaki ta algo cu gobierno no tin e sumanan substancial aki den e presupuesto pa DOW, pa por haci e inversionnan menciona. Esaki ta un di e motibonan cu aña pasa, den transcurso di Juli 2022, gobierno a tuma e decision cu ta bay over na privatiza y haci un overdracht di RWZI na Utilities NV.
Ing. Marlon Croes a indica cu aworaki tin un Comision consistiendo di Jose Figaroa, Tom Rogers di Utilities Aruba NV, representando Minister di Labor y Energia, y su mes persona representando su ministerio den e proceso, y pa guia e overdracht cu a tuma lugar.
“Hopi trabao a wordo haci den e ultimo lunanan cu ta pasando, uno di nan sigur ta haci e visibility pa wak con ta bay financi’e y hopi reunion a tuma lugar. Nos tin un ley cu mester wordo prepara, un Landsverordening cu mester pasa den e simannan nos dilanti, pa por haci esaki posible”, Ing. Croes a subraya.
Entre otro rekisitonan cu a keda cla, e documentonan pa destaho tambe ta cla y tur esaki na momento cu e overdracht a tuma lugar, Utilities Aruba NV cu ta un entidad priva 100% di gobierno, por cuminza haci su sondeonan pa haci inversionnan. “Nos mes ta kere cu den un par di luna e destaho publico por tuma lugar y nan lo entrega e trabao na e ganador di e miho oferta, y e ora ey dentro di dos aña of maximo dos aña y mey nos tin un planta nobo di purificacion”, Ing. Marlon Croes a señala.
