Alegria na Aeropuerto na momento cu team ganador di Trefbal a yega

Colegio Felipe Tromp ta campeon na Weganan Escolar Interinsular

ORANJESTAD (AAN): Diadomingo anochi un cantidad di mayor, famia, y tambe Minister Endy Croes tabata na Aeropuerto Internacional Reina Beatrix pa yegada di delegacion di Aruba cu regresa di Curaçao cu e titulo di campeon den trefbal di Weganan Interinsular 2023.

   E ekipo di Colegio Felipe B. Tromp a derota Curaçao 3-2 den un final emocionante. Cu hopi alegria y entusiasmo e alumnonan di Colegio Felipe B. Tromp a ordo ricibi door di nan mayor-, amigo-, amistad- y maestronan di scol cu tabata warda nan cu blaas y flor.

   Despues di siete aña Weganan Interinsular entre e scolnan di Aruba, Bonaire y Curaçao ta tumando luga back. Minister Endy Croes a indica cu hunto cu colega Minister di Enseñansa, Ciencia, Cultura y Deporte di Curaçao Sithree van Heydoorn y Diputado di Infrastructura y Deporte di Bonaire James Kroon a traha hopi duro pa cuminsa cu Weganan Interinsular back y aña pasa den e luna di september a firma un acuerdo cu hunto lo trece Weganan Escolar Interinsular back.

  Den e disciplina di atletismo tambe nos atletanan a sobresali: Den Categoria 10-11 mucha muhe, Mia Jansen di scol Sagrado Curason a logra conkista prome lugar.  Den Categoria 12-13 mucha muher, Junaily Carty, scol Colegio Laura Wernet a keda na di tres luga.  Den Categoria 12-13 mucha homber, Kymani Hazel di scol Washington a logra un di dos lugar.

   Estafette di Aruba a logra un di dos luga den e categoria 10-11 y nos atletanan a logra un di dos luga den 12-13. E isla meste ta orguyoso di e atletanan cu a representa Aruba den e Weganan Interinsular na Curaçao y a logra conkista e titulo maximo di e torneo.

   Pabien na IBiSA, Indebon di Bonaire y FDDK di Curaçao cu ta esnan cu a prepara e Weganan Interinsular den seis diferente disciplina. E clausura di Weganan Interinsular 2023 ta tuma luga na Aruba den e luna di april venidero.