Historia di Aruba mester haya su luga den nos klasnan

Parlamentario Xiomara Maduro:

ORANJESTAD (AAN): Parlamentario Xiomara Maduro a presencia na Universidad di Aruba e presentacion di e investigacion “Verzwegen Verhalen”, tocante enseñansa di historia di sclavitud, colonialismo y resistencia den e parti Caribense di Reino Hulandes.

   Durante e presentacion, sr. Kenny Meyers a comparti resultadonan di e investigacion, mientras cu sr. Jan Bant a presenta recomendacionnan. Un conclusion importante ta cu alumnonan kier conoce nan propio historia, pero maestronan no semper tin suficiente preparacion y material educativo.

  E investogadornan a resalta cu e problema aki no ta nobo. Ya na aña 1977, den e revista School & Komunidat, number 9, SIMAR tabata pidi atencion pa enseñansa di historia local. Casi 50 aña despues, e mesun retonan ainda ta existi.

   “Ta tempo pa pasa di recomendacion pa accion concreto,” segun Maduro, cu ta enfatisa cuatro prioridad pa Aruba cu ta surgi di e investigacion:
(1) Mas investigacion local: Stimula investigacion di historia di Aruba door di nos propio historiadornan.

(2) Material educativo Arubano: Desaroya lesmaterial tocante nos historia, cultura, sclavitud y resistencia.

(3) Capacitacion di maestronan: Organiza bijscholing y fortalece formacion local den historia.

(4) Uni forsa: Gobierno, Universidad di Aruba, Archivo Nacional, Biblioteca Nacional, Departamento di Enseñansa y e sector educativo mester establece un plan di accion cu responsabilidadnan y un planning concreto.

   “Nos yiunan mester conoce no solamente historia di mundo, sino tambe historia di nan propio pueblo. Despues di casi 50 aña di recomendacion, ta tempo pa uni forsa y haci e trabao.”

   Maduro ta felicita e investigadornan y Universidad di Aruba pa e iniciativa, enfatisando cu e historia di Aruba merece un luga permanente den nos enseñansa.