Interesante foro
ORANJESTAD (AAN): Un vape por tin pantaya, ricibi notificacionnan di mensahe y hasta inclui mini weganan. E smart vapes tabata un di e ehempelnan cu Dr. Caroline Beker a presenta durante e di tres edicion di Breaking the Silence. Stichting Hunto y Directie Volksgezondheid (DVG) a organiza e foro na Renaissance Convention Center bou di e tema Growing Up Under the Influence: The New Addictions, New Risks & New Realities. E foro a yega na su capacidad maximo cu 300 inscripcion di maestro, trahador social y otro profesional di enseñansa.
Vape y dependencia di nicotina: Dr. Caroline Beker, longarts na Horacio Oduber Hospital, a comparti ehempelnan di su practica clinico y a splica con hobennan por desaroya dependencia di nicotina rapidamente. Pa ilustra cu e cantidad di nicotina por ta halto, el a a uza un ehempel cu ta compara un vape di 600 puffs cu dos paki di sigaria. E cantidad di nicotina ta varia segun e producto. Beker a mustra tambe con algun modelo di smart vape ta registra cuanto biaha e persona ta hala y ta uza funcionnan interactivo pa stimula e uzo di e vape.
Di con Hunto a scoge e temanan aki: Stichting Hunto a scoge e temanan a base di situacionnan cu su team ta encontra den su trabao diario cu hobennan y nan famianan. Uzo di vape, tabaco y otro substancia, hunto cu e influencia di social media, gaming y otro desaroyonan digital, ta temanan cu por surgi tanto na cas como na scol. Un maestro por ta un di e prome personanan cu ta ripara un cambio den concentracion, comportacion of participacion di un alumno. Cu e forum, Hunto kier duna educadornan mas conocemento pa reconoce señalnan di preocupacion, habri un conbersacion sin husga y busca sosten adicional ora ta necesario.
Uso di pantaya y salud di muchanan
Mary-Ann Kock, nurse di e seccion Cuido di Salud Hubenil (JGZ) di DVG, a presenta un propuesta di investigacion pa examina e relacion entre tempo di pantaya, salud di wowo y bienestar mental di muchanan di 9 pa 12 aña na Aruba. E estudio tin como meta inclui aproximadamente 627 mucha. Su resultadonan por sirbi como base pa recomendacionnan pa mayornan, scolnan y profesionalnan di salud.
Angela Persad di PRONAD Cariben Consultancy a mustra educadornan con hobennan ta comunica riba plataformanan manera Snapchat y Instagram. el a a papia di sexting, e compartimento di mensahe of imagen intimo, y a splica con un screenshot por haci cu un imagen manda den un chat priva por termina den man di otro hende. el a a trata tambe sextortion, un forma di chantahe unda un hende ta menaza di divulga imagen intimo pa pone presion riba e victima.
Persad a papia tambe di e fenomeno conoci como jumpen, unda un hoben ta wordo ataca of humilia y e grabacion ta wordo comparti riba social media. Partimento di e video por prolonga e humiliacion, y presion di grupo por influencia con otro hobennan ta reacciona.
E forum a trata tambe con inteligencia artificial (AI) por afecta hobennan. Un ehempel ta ora un imagen falso di un alumno, crea cu AI, wordo comparti den un chat di klas. E burla cu cuminsa online por sigui den klas. Pa un educador, esaki por ta e momento indica pa papia cu alumnonan tocante privacidad, e impacto di comparti un imagen y na ken nan por acudi ora nan ta sinti nan bou di presion.
Un combersacion entre cuido, salud publico y enseñansa: E panel a reuni Marcelino Mauricio, Zorg Manager na Stichting Hunto, Angela Persad di PRONAD Cariben Consultancy, Mary-Ann Kock, nurse escolar di DVG, y Jeandre Hessen, director di Mon Plaisir College MAVO. Durante e discusion, e publico a haya espacio pa haci pregunta y conecta e temanan cu situacionnan cu educadornan por encontra den nan trabao diario. Alysha Boekhoudt a guia e programa como maestra di ceremonia.
Stichting Hunto ta gradici Directie Volksgezondheid pa e colaboracion den organizacion di e forum, y Elite y Wind Creek pa nan sosten. Un danki special ta bay na e oradornan, panelistanan y tur participante cu a contribui na e combersacion. Cu Breaking the Silence, Stichting Hunto kier fortifica e colaboracion entre scol, famia y profesionalnan di cuido pa hobennan por haya sosten na tempo.
https://diario.aw/categories/noticia/general/breaking-the-silence-a-reuni-educadornan-pa-aborda-vaping-y-riesgonan-di-social-media-entre-hobennan#sigProId14af2327a5