Barco Friesland a intercepta mas cu 4 ton di droga

ORANJESTAD (AAN): Den cooperacion cu Wardacosta di Caribe Hulandes y US Coast Guard, e barco Zr.Ms. Friesland

a intercepta 4.200 kilo di narcotica den lama Caribe. E intercepcion a tuma luga Diasabra 31 di October.

   Mainta trempan di Diasabra 31 di October, un avion di patruya Dash 8 cu ta pertenese na Wardacosta di Caribe Hulandes a nota un embarcacion sospechoso. Zr.Ms. Friesland a responde door di desplega su dos botonan di intercepcion rapido (FRISC). Esakinan tabata tripula pa un team di Zr.Ms. Friesland, e Scuadron di Seguridad Maritimo, y personal di US Coast Guard.

   E barco sospechoso a ignora multiple ordo pa stop, y a ignora e tironan di advertencia. Finalmente a persisti y nan a stop.

   Via di e accionnan di e FRISCnan, e team di US Coast Guard por a subi e boto lihe. E droga y e sospechosonan a wordo entrega na US Coast Guard.

   For di September, Zr.Ms. Friesland a sirbi como e barco di stashon pa e region di Caribe. Su tareanan ta inclui ehecuta operacionnan anti-narcotico, pa cua e ta traha den rotacion cu tanto US Coast Guard, como tambe Wardacosta di Caribe Hulandes.  Ademas, e barco ta keda pendiente pa brinda ayudo humanitario den caso di desasternan natural, manera horcan.