Henter e tereno di Aloysius School a haya capa nobo di asfalt

ORANJESTAD (AAN): E renobacion di St. Aloysius School na Noord ta yegando su punto culminante. 

E lokaalnan a keda cla, cu tur muraya netchi, plafon nobo, dak briyante, y varios lokaal extra cu a ser crea.  Tur airco nobo ta poni tambe.

   Riba Diahuebs y tambe Diabierna, DOW a presenta cu ekiponan pisa pa asina pone capa nobo di asfalt riba e tereno.  A traha riba e inclinacion pa e afvoer di awa, y di e forma ey nan a traha den un team bon combina pa pone asfalt riba e tereno aki, y asina elimina pa semper e problema den pasado cu plasnan di lodo cu ta forma riba e tereno.

   DIARIO a tuma nota cu e scol a keda masha bunita mes, y cu asfalt riba e tereno lo bay reduci cualkier estorbo di stof tambe ora muchanan ta hungando riba speelplaats.  Pues despues di hopi aña, ta yegando cerca e momento pa e scol luci bek como debe ser.