Hende a bay benta dos puppy atras riba sero na Cas Ariba

ORANJESTAD (AAN): Ta increible pa kere, cu riba e isla aki ainda tin cierto individuo cu ta yama nan mes como ‘ser humano’, ta comete un fechoria asina.

   Diamars merdia net ora cu fotografo di DIARIO a bay riba e pida tereno rond di e Tanki di Awa na Cas Ariba pa saca potret di e tempo di awacero, diripiente a tende un puppy ta sclama pa atencion.

   Ora a tira un bista a topa cu dos caha di plastic cu a worde laga atras y banda pafo di e cahanan, a haya no djis uno, sino 2 puppy cu a ser laga atras eynan pa nan cuenta.

   Ta tristo di mira circunstancianan asina, ya cu con cu bay bin, e dos puppy nan aki no tin e culpa y abo cu a bay tira nan eyriba, posiblemente pa nan muri, bo no mester por ta un hende cu consenshi, mucho menos un hende cu curazon.