ORANJESTAD (AAN): Tabata Diadomingo anochi banda di 7:05 pm, autoridad a haya informacion cu tin un boto riba lama pabao di Palm Beach cu tin seis persona abordo,
y e boto ta yenando cu awa y pa colmo nan tin dificultad pa nabega rumbo pa beach.
Mesora un unidad di Polis di Noord a ser manda na e beach den area di Divi Phoenix, pasobra informe a drenta cu e boto aki awor a bay pega contra e barancanan cu ta forma parti di e Golfbreaker eynan.
Central di Polis a pidi e unidad di Noord pa check loke ta pasando, pa asina dicidi si acaso ta bay pone Wardacosta di Caribe Hulandes na altura di e situacion.
Ora cu Polis a yega eynan, e boto cu ta un Stingray color blanco, y acaba a yega na beach. E capitan mes a bin bisa Polis, cu tur hende riba e boto a yega safe na tera. El a confirma cu tabatin 6 hende abordo, consistiendo di 4 adulto y 2 menor di edad.
E capitan di inicial C. a bisa Polisnan, cu debi na e olanan grandi, esaki tabata dal contra e boto y e parti paden cada rato tabata keda yena mas y mas cu awa. No ta conoci si acaso el a activa su bilge-pump pa saca e awa bek of no. Pero el a bisa cu ora di yega beach, pesey mester a busca un trailer mesora pa asina saca e boto.
El a yama un hende, kende den 15 minuut a yega pa asina yud’e saca e boto di lama. Na final a notifica Central di Polis cu tur cos a keda bon.
