Famia local a keda sorprendi!
ORANJESTAD (AAN): Tin un famia na Aruba cu actualmente ta pasando den dolor di cabez inmenso, relaciona cu un asunto di herencia di nan mayornan awor cu nan a fayece.
Ta trata aki di e cas di mayornan cu a keda atras, y awor un asunto legal ta ser presenta pa asina busca forma pa bende e cas y asina tur yiu y nieto ta bay haya e fair-share di esaki.
Sinembargo a presenta un situacion caminda algun di e yiunan ta opina cu nan no ta di acuerdo cu e idea, y ta reclamando cu cierto asunto di e proceso aki via Notario no a wordo trata manera nan ta deseando.
E demas rumannan si ta di acuerdo, y ta opina cu mester laga e proceso normal aki cana su rumbo sin molester, pa asina no tin tardanza.
Pero recien a sali na cla, cu e otro grupo a dicidi na acerca un Abogado na Aruba pa asina busca forma toch pa cambia e proceso, y trata na dobla e patronchi di e curso normal di casonan asina.
Loke a bin dilanti despues ta cu e Abogado aki lo a conseha e yiunan aki, pa nan bay na e cas y pa nan “breek in” den e cas! Esaki ta un conseho cu a laga e otro grupo keda babuca. Pasobra ta imposible pa kere cu awendia un Abogado di Ley ta conseha clientenan pa nan bay comete algo cu ta contra ley.
E conseho pa hendenan bay comete kiebro y drenta den un cas, cu ta den proceso di Notario pa wordo bendi, ta cuminda ilumina duda den e nocion, y tambe e intencion di e Abogado pa cu su clientenan.
No ta conoci ainda kico e otro grupo di famia ta bay haci cu e informacion aki. Si acaso ta bay keha e Abogado, of pone Ordo di Abogado (OvA) na altura di e tipo revolucionario di conseho cu clientenan ta haya di nan representante di ley.
Ta di warda awor pa check con e informe aki ta desaroya, pasobra e grupo mes te ainda no por kere cu di berdad un Abogado ta conseha hende pa bay comete kiebro den un asunto asina delicado. E potret aki ta di referencia.
