Helicopter a yuda homber cu a sali cay for di baranca na Curaçao

WILLEMSTAD: Tabata Diabierna cu alarma a wordo bati na Guardacosta di Caribe Hulandes, di un caso serio cu a socede na isla di Curaçao. 

A drenta informe cu un homber pa un motibo of otro a sali cay for di baranca na altura di ‘Shut’ na costa panort di Curaçao.  Ta conoci cu lama na costa panort di e isla ta hopi bruto, y coriente ta fuerte eynan.

   Esey a pone cu Rescue and Coordination Center (RCC) di Guardacosta a pone nan Helicopter lanta vuelo pa bay busca forma pa rescata e homber for di lama.

   E personal di Guardacosta ta bon entrena pa e tipo di rescatenan aki, y rapidamente nan a localiza e homber, y a drenta den accion pa dune yudanza, y a logra di hise bay halto cune den e Helicopter.

   Despues cu nan a caba di rescata e homber, nan a bay cune rumbo pa Aeropuerto Hato na Curaçao, unda un Ambulans tabata presente pa asina bay cune rumbo pa Hospital.  Sigur hopi bon trabao na esnan di Guardacosta.