Famianan di Goy Faro y Maikel Feliciana recordando nan desaparicion 30 aña pasa  

A benta un krans na lama

ORANJESTAD (AAN): E ta un fecha cu famia lo no lubida hamas.  Un angustia di otro mundo cu nan a pasa aden na Juni 1992 ora cu a cuminza realiza cu e conocido piscadornan Goy Faro y su amigo Maikel Feliciana lo no regresa mas.

   Pesey mes Diasabra atardi na altura di Fisherman’s Huts, un cantidad di famia y conocirnan a reuni bao di un Tent poni riba beach, pa asina Pastoor a presenta y duna un respons, unda a bay benta un krans den lama.  Esaki ta debi cu ta recordando e hecho cu 30 aña pasa, nan sernan stima a subi lama y nunca mas a regresa.

   Nan ta indica cu nan primo/ruman George Faro mihor conoci como Goy, a subi lama pa bay pisca.  Y el a bay cu su amigo Maikel Feliciana.  E momento di angustia cu nan a pasa aden na 1992 a pone nan keda hopi anochi sin drumi.

   Na e ocasion aki, tratando di conmemora Goy y Maikel den un bon atmosfera, a pidi esnan presente acudi bisti na jeans, short, of shimis, den camisa, of hotpant.

   Pa awor nan tin paz den nan curazon, y ta sigur cu nunca lo bay haya sa kico a pasa riba lama.  Pero nan ta spera cu e alma di nan ser keri lo ta descanzando na paz.