BARQUISIMETO: E ta conoci como ‘Tusi’, of djis como Cocaina Roos. Autoridadnan a admiti cu na cierto parti di Venezuela,
hoben y adolescentenan ta usando esaki masha hopi mes den Nightclubnan. E ta wordo haya hopi na estado Lara, y principalmente na e parti pariba di e ciudad di Barquisimeto.
“Tusi” no ta un droga nobo, pero si e ta wordo distribui mas na e ciudad y esnan cu ta usando e droga, ta hobennan di clase halto, debi cu e prijs di e cocaina aki ta hopi halto pa cada gram.
E Cocaina Roos aki ta un droga sintetico, pues casi e no tin nada di haber cu e cocaina blanco, djis cu e ta tambe den forma di puiro. Ademas di esey, toxicologo- y specialistanan a bisa cu ‘Tusi’ ta mucho mas peligroso, como cu e ta haci hendenan bira adicto mas rapido.
Un publicacion algun tempo pasa, a bisa cu e formula quimico di Tusi ta basa riba e composicion di e droga LSD, ademas e tin un proporcion di MDMA, cu ta trata di un combinacion di tur dos substancia di droga cu ta causa halucinacion y sensacion di euforia.
E droga aki bo por come via boca, of inhale cu bo nanishi. Pero specialistanan y autoridadnan ta di acuerdo, cu e ta un droga hopi peligroso mes pa e salud di esnan cu ta us’e.
Autoridadnan na Barquisimeto a mustra cu e tipo di droga aki ta hopi popular cerca hobennan di entre 18 y 25 aña di edad. E lugar unda mas ta bende ‘Tusi’ ta den Nightclubnan, pero autoridad tin dificultad pa topa cu e bendedornan, como cu nan ta hopi cauteloso y no ta wordo localiza asina facil.
Semper den Nightclubnan Venezolano ora di tene razzia, autoridad ta bin topa cu algun gram di droga manera marihuana. Pero desde 2021, nan ta bin ta nota cu e Cocaina Roos aki ta birando mas popular. Esey a pone cu autoridadnan awor ta mas interesa pa topa cu esnan cu ta distribui e droga aki.
Na fin di luna di Mei 2022 mes, durante un razzia inespera na Nightclubnan unda nan ta sospecha cu tin bendemento di Cocaina Roos, a bin gara 3 persona cu ta forma parti di un banda criminal dedica pa bende Tusi. Dos homber di 30 y 21 aña di edad, y un muher yama Nancy Gude di apenas 18 aña a keda deteni.
