Harbour House y HarbourWalk a haci su apertura oficial na Paardenbaai

ORANJESTAD (AAN): Diahuebs den un ambiente ameno a tuma luga e gran apertura di Harbour House y HarbourWalk.

Un dia hopi special pa Pering Group, unda cu alabes a celebra 20 aña di existencia na Aruba, recordando nan comienso na Aruba y tur nan logro te cu awo.

Sr. Irwin Perret, gerente di Pering Group a yama tur invitado bon bini y tabata sumamente contento y orguyoso di su team cu a haci Harbour House y HarbourWalk un realidad.

For di un edificio bandona y lubida, a wordo converti den un joya di proyecto cu lo priminti di realmente trece bida bek den e area di Schoenerhaven y di e forma aki aporta na crecimento sostenibel di economia di Aruba.

"Nos a comproba cu pa e ultimo 20 añanan aki na Aruba, trahando cu honestidad y compromiso, ta wordo debolbi cu honestidad y compromiso di su hendenan. P'esey awe y semper, nos curason ta di Aruba", tabata palabranan di Sr. Irwin Perret. Sr. Alberto Perret kende hunto cu su ruman Irwin, a encabesa e proyecto di Harbour House y HarbourWalk a finalisa cu un bunita presentacion di e historia di Pering Group y tur su logronan den e ultimo 20 añanan di existencia.

Na mes momento Pering Group a tuma e oportunidad di re-introduci nan plataforma di Corporate Social Responsibility, Fundacion P.A.N.A. y vocifera nan compromiso cu Aruba pa aporta, a base di 3 pilar di desaroyo comunitario cu ta un comunidad di Herencia Cultural, un comunidad di Conocimento y un comunidad di Bienestar Social. Fundacion P.A.N.A, Pa Amor di Nos Aruba, a priminti di sostene Fundacion Leerorkest y Impact Hub Aruba y di e forma aki duna bek na e comunidad di Aruba.