ORANJESTAD (AAN): Durante e conferencia di prensa di tur Dialuna, minister di Finanzas y Asuntonan Economico y Cultura Xiomara Maduro a bin cu bon noticia.
E mandatario a bisa cu Aruba ta recuperando.
“E siman aki a habri cu bon noticia, den sentido cu Aruba ta recuperando y nos recuperacion ta basa riba locual ta move economia na pais Aruba, cual ta turismo”.
Nos a mira sigur cu siman pasa e prome barco Crusero ta yega, pero tambe mas avion yen di turista ta yegando nos isla, segun Maduro.
El a sigui bisa cu importante tambe ta e hecho cu e turista cu ta biniendo ta lagando mas placa atras y cu esey ta yudando Aruba pa por recupera.
E mandatario a sigui bisa cu constantemente hunto cu Prome Minister ta sinta den un grupo hunto cu e stakeholders, esta ATA, AHATA, Departamento Economico, Banco Central y Aruba Airport Authority, pa asina hunto repasa e avancenan cu tin.
Asina ta mira kico e indicadornan ta mustra riba e parti economico.
“Mester bisa cu recientemente nos a sinta hunto y atrobe a sali afo cu nos ta recuperando, pues nos ta bayendo den bon direccion”.
Ya caba aworaki Aruba ta na 55%, si compara esaki cu 2019.
Si tur cos sigui bon, pa fin di aña nos lo por recupera na 68% di turismo cu ta bin Aruba, segun e minister.
El a sigui bisa cu AHATA a indica cu e ocupacion di e hotelnan ta na mas cu 55% compara cu 2019 y cu esey ta indica cu e turistanan ta kedando y yenando hotelnan.
“Esey ta un bon noticia pasobra nos ta ripara cu e cuponan di trabao ta bin bek”.
Ya caba tres siman pasa SVB a informa nos cu ya caba tin mas relacion di trabao, pues tin mas hende cu a wordo inscribi den e registro di SVB, pues poco poco nos ta recuperando di e consecuencianan cu COVID-19 a bin cune, segun Maduro.
