Haciendo un paso pa elimina e sero di dump banda di lama na Parkietenbos

ORANJESTAD (AAN): Diahuebs atardi a marca un otro momento historico pa cu e saneamento di dump di Parkietenbos,

unda cu Minister Arends a bishita Notariskantoor Rodriquez-Taekema pa e momento oficial di habri e envelopnan cu e oferta tecnico di varios compania cu ta participando den e destaho publico pa e ‘deelproject: herprofilering stortplaats te Parkietenbos’.

   Pa un destaho publico, transparencia den e proceso ta esencial y mester por wordo garantisa. For di e perspectiva aki, tur compania cu a busca e bestek tambe tabata presente pa e momento importante aki.

Den e siman benidero, e comission tecnico cu a wordo estableci lo ta evaluando e oferta tecniconan, y Diaranson mainta e envelopnan cu e ofertanan financiero lo wordo habri na oficina di notario pa por continua cu e proceso di evaluacion.

   E stap aki den e proceso di saneamento di Parkietenbos ta pa evita e riesgo di un desaster ambiental, ya cu e cero di e dump na banda di lama (zuid y west) ta mucho stijl, y lo por cay den otro, asina aki causando daño immenso na nos naturalesa y bida marino.

   Pa motibo aki, hunto cu e saneamento di asbestos, e dos proyectonan aki a wordo identifica como prioridadnan halto y mi Ministerio, hunto cu tur e profesionalnan di tanto gobierno pero tambe expertonan internacional, a traha cu prioridad pa por cuminsa e proceso mas pronto cu ta posibel pa mitiga e riesgonan aki pa ambos salud publico y pa nos medio ambiente.

   Na momento cu tin mas informacion tocante e proyectonan aki, lo comparti mas informacion.