Directie Natuur en Milieu ta informa:
ORANJESTAD (AAN): E falki peregrino (Falco peregrinus) ta un di e parhanan di presa di mas rapido y fuerte conoci den e especie di parha. E ta conoci pa su vuelo hopi lihe, alcansando un velocidad asombroso di 320 km/h (200 mph) durante su buceo pa gara su presa.
E ta un di e animalnan di mas lihe na mundo. E parha aki ta midi entre 34 pa 58 centimeter y tin un ‘wingspan’ di entre 74 pa 120 centimeter.
E plumashi di e falki peregrino macho y e embra ta similar pero na unda tin un diferencia ta den e tamaño. E embranan ta ongeveer 30% mas grandi cu e machonan y tambe den peso ta observa e diferencia aki.
E macho por pisa te 1000 gram y e embra te casi 1500 gram. E plumashi di e falki peregrino ta shinishi scur casi manera un color blauwpreto riba su lomba. E punta di su halanan si ta color preto. Ora cu e habri su halanan por wak color blanco cu piek piek bruin bou di su curpa. Riba su cabes tin manera un mustashi cu ta pasa na su cauchinan, esaki ta color preto cu ta accentua su nek color blanco. E comienso di su piek y su pianan ta color geel y su piek mes ta color shinishi of preto.
E ta come principalmente otro parha chikito te esun nan size mediano manera paloma, blenchi y pato. E ta pluma su presanan prome cu e come nan. E ta come bestianan cu ta lastra manera lagadishi y tambe insecto.
E falki peregrino ta pone 3 pa 4 webo color blanco sushi cu marcanan cora cu bruin. No tur e webonan ta broei. E yiunan ta keda den neishi y despues di 40 dia nan ta bula. Nan ta keda depende di nan mayornan pa 2 luna largo.
E parhanan aki por alcansa pa biba te casi 19 aña. E menasa pa e especie aki ta contaminacion, uzo di pesticida cu por afecta nan salud y perdida di habitad na unda ta construi hopi edificio cu ta stroba nan. Nan ta accidenta cu structuranan crea pa hende, na unda nan ta dal, cay y muri.
Falki Peregrino ta un parha impresionante cu tin un parti importante den nos ecosistema. Ta importante pa proteha nan habitat y evita contaminacion pa sigura nan sobrevivencia.
