Hunto mas fuerte pa resilencia di clima den Reino Hulandes  

ORANJESTAD (AAN):   Wereld Natuur Fonds (WWF-NL) ta contento cu e sosten financiero adicional di Nationale Postcode Loterij pa Dutch Caribbean Nature Alliance (DCNA).

Cu esaki por realisa un programa coordina den e parti Caribense di e Reino, cu ta fortalece proyecto existente y ta mehora cooperacion. E iniciativa aki ta contribui na e ambicion di WWF-NL pa realisa mas programa regional cu tin un impacto mas grandi riba restauracion di naturalesa y resilencia climatico. 

Programa Regional pa Resilensia Climatico
            E proyecto di tres aña ‘Conservation and Restoration of Key Habitats’ tin como meta pa mehora e resilencia climatico di e area Caribense. Por logra esaki door di coordina esfuerso local pa proteha y restaura mondi na costa, palonan di mangel, yerba di lama y rifnan di coral. Door di integra proyectonan bou di un programa regional, gastonan ta bay abou, eficiencia ta subi y e impacto ta crece considerablemente. E programa aki ta dirigi pa DCNA, cu sosten di WWF-NL riba conocemento y financiero. 

Contribucion di WWF-NL
            WWF-NL ta contribui cu conocemento valioso y experiencia for di e red WW internacional, cu ta inclui experiencia di restauracion di costa na Colombia, cooperacion cu Global Mangrove Alliance y otro experiencia den e red mundial di WWF. E iniciativa aki ta yuda esnan cu ta ehecuta proyecto na e seis islanan Caribense pa comparti ‘best practice’s y fortalece e iniciativanan local di restauracion. E meta final ta crea areanan na costa cu ta resistente den tur region Caribense caminda WWF-NL ta activo. “Cooperacion ta clave,” segun Monique de Water, manager di programa di WWF-NL pa e programa Dutch Caribbean. “Door di uni e esfuersonan, nos por logra mas impacto mientras cu nos ta fortalece y armonisa programanan existente.” 

Educacion y Cambio di maneho
            Banda di restauracion di naturalesa, e programa ta enfoca riba amplia conscientisacion riba e importancia di areanan natural. Esaki ta logra cu programa educativo, publicacionnan y actividadnan di contacto cu comunidad. Ademas, DCNA ta traha hunto cu WWF-NL, gobiernonan y otro partinan interesa pa mehora maneho, segura finansa y crea un structura legal pa costanan resistente cu tin beneficio pa naturalesa y hende riba un termino largo.