Haci uso di oportunidad y bay vacuna durante 'Vacunathon 3.0'

ORANJESTAD (AAN): Minister Dangui Oduber a bisa cu anteriormente Crisis Team a organiza dos Vacunathon, uno tabata pa personanan riba 18 aña y e di dos tabata un 'Youth Vacunathon' pa mucha y hoben di riba 12 aña.

Minister Oduber a anuncia cu debi na e demanda y situacion actual na Aruba, a dicidi pa organiza e di tres Vacunathon. E Vacunathon aki a haya nomber di 'Vacunathon 3.0' y lo tuma lugar diadomingo awo dia 22 di Augustus di 9'or di mainta pa 4'or di atardi na The Ritz Carlton Aruba Ballroom.

E meta di e Vacunathon ta pa vacuna entre 2 mil y 2.500 persona riba e dia aki. Minister Oduber a urgi specialmente mucha y hoben di riba 12 aña cu ainda no a vacuna, como tambe tur adulto cu ainda no a bay vacuna pa haci uso di e oportunidad aki. No tin hopi localidad mas cu ta ofrece e vacuna aki.

Despues di caida di casonan, DVG a dicidi di schaalaf e lugarnan di vacunacion. Centro Deportivo Betico Croes no ta disponible mas y pa motibo aki ta bay haci uso di e Ballroom di The Ritz Carlton.

Gobierno ta gradici The Ritz Carlton pa nan ayudo, cu desde un principio a pone e ballroom disponible pa e prome vacunathon.

Minister Oduber ta haci un yamado na comunidad cu ainda no a vacuna pa probecha di e oportunidad aki pa 'walk-in' y tuma nan vacuna. Cuida bo mes y proteha bo famia. Cifranan ta mustra cu e vacuna ta duna su resultado.