ORANJESTAD (AAN): Minister Dangui Oduber a informa cu e situacion actual di Covid-19 na Aruba ta keda uno preocupante.
Aruba tin mas di mil caso activo y apesar cu nos a yega di maneha e cantidad di caso aki, e diferencia ta cu den pasado tabatin asistencia di personal di AMI, un cooperacion di Hulanda y na dado momento, tabatin mas di 60 personal extra pa yuda den unidad di cuido intensivo y piso di Covid.
Actualmente Hospital no ta conta cu e personal aki, despues di schaalaf na comienso di juli, cu practicamente no tabatin casonan di Covid y Hospital tabata practicamente bao di control. Despues di detecta variante Delta, a cuminsa mira un aumento substancial di casonan y esaki a causa cu mester bay busca yudanza atrobe pa atende e casonan den Hospital. Diabierna ultimo mas personal a yega Aruba pa asina yuda Hospital cu e casonan di Covid.
Dialuna ultimo, durante un combersacion bilateral cu Secretario di Estado Blokhuis, Gobierno di Aruba a haci un peticion pa haya mas personal. Nan ta na caminda pa Aruba pa alivia e situacion na Hospital.
