Habitantenan cerca di Catiri ta papiando awor di un ‘sombra’ cu sa mira cruza caya banda di e piedra blanco

ORANJESTAD (AAN): Relaciona cu e accidente tristo di Diadomingo madruga, caminda dos persona a perde nan bida riba e caminda di Catiri,

diferente habitante di e area a contact DIARIO pa asina nan duna un splicacion di e lugar y area unda e accidente aki a cuminza socede.

   E habitantenan a bisa, cu segun nan, ta desde Diahuebs anochi (29 di Juli 2021) caba, varios automobilista a tuma nota cu den e birada peligroso aki, pa ser mas exacto, caminda e piedra blanco ta situa banda caminda, por a nota con “un sombra” tabata cruza di un banda pa e otro.

   Awor cu e accidente lamentable a tuma lugar, varios di e habitantenan ta bisa cu kizas ta esnan cu a perde nan bida algun periodo y añanan pasa, na e mesun caminda aki, e “alma lo ta zwerf rond ainda”.   Nan ta corda con den pasado, un persona a perde su bida tragicamente eynan anto riba un Diadomingo madruga tambe pa colmo.

   Diferente ciudadano a yega di fayece eynan, y a menciona uno di fam P. cu tabata traha na Hospital, y a muri eynan cerca di e piedra riba un anochi di Diasabra pa Diadomingo. Tambe ta corda un otro ciudadano di fam D. cu tabata bin di otro banda y el a fayece pabao di caminda cerca di e palo di kwihi.  Despues di nan tabatin varios biaha cu hende ta mira ‘sombra’ riba caminda, y chauffeurnan ta kere cu ta hende kier cruza of algo por estilo.

   Un habitante a bin cu e hipotesis, cu kizas e Toyota Yaris color cora cu e pareha tabata coriendo riba Diadomingo madruga cu a pasa, lo por “a topa cu e sombra diripiente”, y esaki lo por a pone nan spanta y hala stuur banda robez pa no dal e ‘sombra’, y e cambio diripiente di direccion aki lo por a pone perde control di e auto pa asina hala bek na banda drechi dal contra algun baranca, y despues baha na banda robez y bay claba contra e cura di cas.

   A ser mustra cu e chauffeur aparentemente no tabatin su seatbelt bisti y pesey lo a haya tur golpi na su pecho, y e dama a kibra garganta como cu mayoria di e golpi tabata na su banda.  Como cu e auto aki den pasado a yega di haya accident tambe caba, e no a wordo drecha bek y poni cu airbag mescos cu e tabata den pasado ora di a sali for di fabrica.

   Por lo menos un habitante ta pidi pa un pastoor bay na e lugar aki cerca di e piedra blanco, pa resa pa e almanan cu lo a perde nan bida na e lugar aki y basha poco awa bendita, pa asina e almanan por sosega na paz.