Randall Croes di SPCOA cerca Formador: - ORANJESTAD (AAN) — Den e cuadro di reunionnan cu stakeholders,
pa sigui cu e proceso di formacion di gobierno nobo, SPCOA (Stichting di Scolnan Protestante Aruba), a haya oportunidad di participa, representa pa señor Randall Croes.
Den e conferencia di prensa cu a sigui na e reunion, Randall Croes a duna su declaracion relaciona cu e resultado di e encuentro aki cu Formador Evelyn Wever-Croes.
Randall Croes a menciona cu el a cuminza su disertacion informando tocante e proyecto di HAVO cu SPCOA tin andando.
SPCOA a implementa e proyecto aki desde aña pasa y awo nan ta den su di dos fase, door di presupuesto 2020-2021 parti poco poco, pa rond af esaki pa 2022.
Croes a splica cu durante e reunion cu Formador a pidi sosten pa e proyecto aki, y a presenta algun necesidad cu tin pa loke ta personal y a enfatiza riba e scarcedad di maestro cu tin na Aruba, y con pa maneha esaki cu e talentonan local, pa busca nan na Aruba mes, y coordina bon cu base di dato cu tur scol sa, ki maestro ta disponible, cuanto ora nan ta ocupa, y si nan por yuda otro pa tur e maestronan ta bezig full time cu nan capacidadnan.
Randall Croes a menciona tambe cu tin scolnan cu mester di ayudo, pues pa haya inversion, por ehemplo un primario y un secundario na San Nicolas, cu el a menciona.
E scolnan aki tin bon structura y bon ubicacion pero tin hopi cos cu mester wordo drecha manera bentana, cura, verf, plafon, aire acondiciona, y algun ekipo cu nan mester, igual na otro scolnan cu tin den otro distritonan.
