ORANJESTAD (AAN): Anne Marie Proveyer-Groot, Director di Departamento di Enseñanza, hunto cu su colega Sheila Maduro,
a reuni cu Formador den cuadro di e encuentronan cu ta tumando lugar, den e marco di formacion di Gabinete Wever-Croes-2.
Den conferencia di prensa tocante e resultado di e reunion cu Formador Wever-Croes, Anne Marie a splica cu specificamente pa e reunion aki, nan a traha un documento cu diferente punto y reto cu tin den enseñanza, y vooral a trece padilanti e importancia pa traha na un manera integral, hunto cu tur e stakeholders, na mehoracion di enseñanza na Aruba.
A toca diferente punto di atencion cu Departamento di Enseñanza tin, manera entre otro, recapacitacion di maestronan, actornan den enseñanza, mehoracion di e sistema di subsidio, digitalizacion, mehoracion di material pero tambe e proyectonan grandi cu Directie ta bezig cune, un ta e Scol Arubiano Multilingual y otro cu nan a inicia caba, ta e acoplamento di enseñanza di EPB na Colegio EPI, na un forma mas al caso pa nos comunidad, y cu hunto cu algun stakeholders eyfo (bedrijfsleven) kier mehora e contenido di enseñanza, pero tambe e forma con nan ta dunando ley den e beroepsonderwijs.
“Nos ta trahando cu hopi programa cu ta bin for di Hulanda, y nos ta scucha for di mercado laboral cu e muchanan cu ta caba nos enseñanza, no por loke mester den nos mercado laboral. Dus, eymes ta importante pa nos inverti, pa yega na siña nan loke nos mester y no loke na un otro pais ta necesario” director di Departamento di Enseñanza, Anne Marie Proveyer-Groot a señala.
