Habitante encanta cu e flornan di Dama di Anochi

ORANJESTAD (AAN): Ciudadanonan ta raportando e dianan aki, cu nan ta keda encanta pa mira con nan cadushi ta produciendo flor den oranan di atardi y anochi.

   Esaki ta e conocido “Dama di Anochi”, cu ta un cactus bunita y di cual su flornan ta habri solamente anochi, y ya caba pa mainta e ta marchita.  Pues e ta habri solamente un anochi.

   Un ciudadano cu a nota cu diripiente atardi laat cu e cadushi na su cas a habri tur na flor, mesora a pasa man pa su camera y saca potret.

   El a splica na DIARIO, cu ademas e flor ta produci un fragrancia masha placentero tambe.  Nan a mira con e flor mes a keda habri pa cierto cantidad di ora.

   Dama di Anochi ta conoci pa su nomber cientifico ‘Cereus hexagonus’.