ORANJESTAD (AAN): Como preparacion pa tur instancia di cuido por cumpli cu e rekesitonan nobo, DVG a divulga cu entrante Dialuna awor, lo drenta e fase di ehecucion pa cu AruBIG.
Conforme e Decreto nacional AB 2021 no. 79 y art. 42 di e Ordenansa nacional profesionnan den salud of e asina yama “AruBIG” ta drenta den su fase di ehecucion denter di 3 luna despues di e publicacion di e Decreto nacional di 15 di mei 2021.
Despues di varios luna di preparacion a yega asina leu cu e prome fase di e Registro di AruBIG lo worde lanza. Den un serie di 3 comunicado di prensa Departamento di Salud Publico (DVG) kier informa publico en general e cambionan cu e ley nobo ta trece cu n’e, mirando cu e ley ta uno hopi extenso.
Den e prome parti aki lo duna un splicacion tocante cua profesion mester inscribi y cua diploma ta reconoci.
E profesionnan: Actualmente e siguiente profesionnan ta rekeri pa inscribi den e AruBIG:
- Boticario (Apotheker);
- Medico (Artsen);
- Dentista (Tandartsen);
- Partera (verloskundigen);
- Fisioterapista (fysiotherapeut).
No ta importante si bo persona ta trahando 20 of 50 aña caba na Aruba. Tur e profesionnan aki mester registra pa prome biaha of di nobo pa por eherce nan funccion y haya e derecho di carga e titulo di nan profesion. Pa esnan cu no ta yega na remarca of no tin un diploma reconoci, pero tin mas cu 10 aña trahando of mas cu 5 aña trahando como specialista por yega na remarca pa worde registra den un registro special.
Pa esaki mester entrega documentacion cu ta prueba cu a haya permiso of yega di pasa un examen na Aruba pa traha como dokter, dentista, partera of boticario, of cu a studia na un universidad reconoci e tempo ey.
Diploma reconoci: Lo siguiente ta duna e derecho pa registra den AruBIG:
(1) Pa tur profesion, un number di BIG di Hulanda (Nederlandse BIG-nummer) y registracion como specialista den e asociacion reconoci na Hulanda (p.e. RGS pa medico).
(2) Pa medico alternativamente documentacion cu ta prueba cu a pasa exitosamente e board exam di USA of Canada, irespecto na unda bo persona por a studia;
(3) Pa medico alternativamente e diploma di e siguiente universidadnan na Costa Rica: Universidad de Costa Rica, Universidad Latina de Costa Rica of Universidad de ciencias medicas (UCIMED);
(4) Pa medico alternativamente e diploma di e siguiente universidadnan na Colombia: Universidad El Bosque of Pontificia Universidad Javeriana;
(5) Pa dentista alternativamente e diploma di siguiente universidadnan na Costa Rica: Universidad de Costa Rica of Universidad Latina de Costa Rica;
(6) Pa dentista alternativamente e diploma di e siguiente universidadnan na Colombia: Universidad El Bosque of Pontificia Universidad Javeriana.
Pa estudio local no tin ningun reconoci na e momentonan aki fuera di e estudio di specialismo “arts arbeid en gezondheid Aruba” duna pa e scol NSPOH di Hulanda.
Pa reconocimento adicional via e Instituto di Calidad, esaki lo ta reserva pa un siguiente fase cu lo worde anuncia despues.
Aki algun dia, DVG lo splica mas tocante e specialismo y rekesitonan prome cu por aplica pa registracion.
